Александр Ахременко уонна Борис Иванов «Доруобуйаҥ – бэйэҥ илиигэр» диэн кинигэлэригэр чөл буолууга, эти-сиини чэбдигирдиигэ, ис уорганы ыраастаныыга, ньиэрбэ тиһигин уоскутууга, сөпкө тыыныыга о.д.а. туһалаах сүбэлэрэ киирдилэр. Организм киртийдэҕинэ, шлак дьапталҕаланан муһуннаҕына доруобуйаны кэбирэтэр, онтон хайдах ыраастаныахха сөбүн бу кинигэттэн билиэххит.
Рафаэль Баҕатаайыскай, Арчылан «Алмаас уонна хара дьай» сэһэннэригэр ааспыт үйэ 60-80 сылларыгар көмүстээх Алдаҥҥа, алмааһынан айхалламмыт Айхалга, Анаабырга, Депутатскайга, Мирнэйгэ, Томмокко, Өймөкөөҥҥө халыҥ харчы туһугар сиртэн хостонор баайга үлэлии кэлбит араас дьылҕалаах дьон олоҕо ойууланар. Алмаас күлүмүрдэс чаҕыла аан дойду үрдүнэн бар дьону абылыыр даҕаны, күндү таас сороҕор харах уутун аҕалар хара дьайдаах дииллэрэ төһө оруннааҕын бу кинигэттэн билиэххит.
Үгүс ааҕааччы кутун туппут суруйааччы Татьяна Находкина «Билиҥҥи кэм прозата» сериянан «Өтөх иинэ өспөт» диэн саҥа кинигэтигэр элбэх саҥата суох эрээри, күүстээх ис санаалаах, бүгүрү үлэһит тыа сирин дьонун олоҕун сырдатар. Манна аас-туор сэрии кэмин саҕана доҕордоһуу, таптал, бэйэ-бэйэҕэ сыһыан нөҥүө ааптар сиэр-майгы араас түгэннэрин сытыытык туруорар, дьон психологиятын арыйар, ону сэргэ социальнай кыһалҕалары таарыйар.
Ким баҕарар сүрэҕин абылыыр Сахабыт сирин биир мааны айылҕалаах дойдута «Амга – жемчужина Якутии» диэн альбом дьэдьэннээх сыһыылаах, сугуннаах ойуурдаах, ыраас уулаах Амма кэрэ кытылын эһиэхэ арыйар. Бу альбом тэтэркэй сардааналаах кырдаллар, хатыҥнардаах чараҥнар, киһи эрэ дууһатын кылын таарыйар айылҕа кэрэ көстүүлэринэн умсугутар.
«Ааҕа үөрэнэбин» сериянан Суорун Омоллоон «Бээчэ бэргэһэтэ» диэн кинигэтигэр истиҥ-сэмэй, ардыгар көрүдьүөс, үтүөҕэ сирдиир, сиэргэ-майгыга үөрэтэр тэттик кэпсээннэр киирдилэр.
Уопуттаах педагог, оҕону иитээччи Клавдия Васильева «Тыа саҕатыгар» диэн мультик курдук киһи эрэ көрө олоруох дьэрэкээн ойуулаах кинигэтигэр тэттик остуоруйалар оҕолору сэмэй, кырдьыксыт, аһыныгас сүрэхтээх, үтүө суобастаах буоларга үөрэтэллэр.
Комментарии
Авторизация на сайте через социальные сети