Саха Өрөспүүбүлүкэтигэр барыта 210 ФАП баар. Тыа сирин нэһилиэнньэтин доруобуйата тупсарыгар доруобуйа харыстабылын үлэһиттэрин бастакы звеноларын, ФАП-ры тэтимнээхтик тутуу улахан суолталаах. «2012-2017 сс. Саха Өрөспүүбүлүкэтигэр доруобуйа харыстабылын сайыннарыы» судаарыстыбаннай бырагыраама чэрчитинэн 2012-2014 сылларга 18 ФАП үлэҕэ киирдэ, бу сыл бүтүөр диэри өссө 7 фельдшер-акушер пууна тутуллара былааннанар.
2014 сыл ахсынньы 24 күнүгэр Саха Өрөспүүбүлүкэтигэр фельдшер-акушер пууннарын сайыннарыыга бырайыак бырагырааматын бигэргэтэр туһунан» СӨ бырабыыталыстыбатын дьаһала ылыллыбыта. Бырайыак быһыытынан 2015-2016 сылларга тыа сиригэр уопсайа 1 млрд суумалаах 100 ФАП тутуллуохтаах.
Тыа сирдэригэр доруобуйа харыстабылын объектарын, чуолаан фельдшер-акушер пууннарын, тутуу туһунан СӨ доруобуйа харыстабылын миниистирэ Александр Горохов маннык кэпсээтэ:
– Ороссолодуоҕа ФАП аһыллыытыгар кыттан кэллибит. Аҕыйах сыл иһигэр Мэҥэ-Хаҥаласка үһүс пууммутун үлэҕэ киллэрдибит, а.э. бюджеттан үбүлэммит 29-с ФАП буолла. Бу сыл бүтүөр диэри эмиэ Майаҕа өссө 2 саҥа пууну үлэҕэ киллэриэхтээхпит. Оччоҕо манна 5-с ФАП буолар. Өссө 5 учаастактааҕы балыыһа киирдэ. Онон аҕыйах сыл иһигэр Мэҥэ-Хаҥалас улууһа доруобуйа харыстабылыгар 12 саҥа объектанна.
Ону таһынан бюджет үбүлээһининэн буолбакка, судаарыстыбаннай-чааһынай ньыманан үлэлээһини бу сылтан олоххо киллэрэн эрэбит. Ити бырагырааманан быйыл сайын 1 ФАП Уус-Алдан улууһун Бээрийэтигэр киирдэ. Быйыл 7 ФАП бюджеттан үбүлэммит буоллаҕына, биэстэн тахса ФАП судаарыстыбаннай-чааһынай ньыманан тутуллуоҕа. Бу – доруобуйа харыстабылыгар биир улахан ситиһии. Тутуу боппуруоһа саамай ыараханнык хамсааһына хотугу улуустарга бэлиэтэнэр. Навигация, тутуу матырыйаалаларын тиэйии уод.а. боппуруостар үөскүүллэринэн, судаарыстыбаннай-чааһынай бииргэ үлэлээһини уустугурдар эрээри, бу бырагырааманы салҕыы сайыннарар санаалаахпыт.
Уопсайынан, тыа сиригэр эмчиттэр үлэлиир саҥа объектарын, ол эбэтэр ФАП-ры тутуу – биһиэхэ, улахан объектарбыт курдук, биир дьоһун суолталаах хайысхабытынан буолар. Тоҕо диэтэххэ, тыа сирин сайдарыгар, үлэһиттэри олохсутарга, нэһилиэнньэ хаачыстыбалаах өҥөнөн туһанарыгар сөптөөх усулуобуйаны тэрийиэхтээхпит. Куоракка специалист олороругар дьиэни-уоту син булуохха сөп уонна усулуобуйа баар буоллаҕына, тыа сиригэр олорор дьиэ-уот эмиэ биир сытыы боппуруоска кубулуйар. Оттон биһиги тутар объектарбыт уратыларынан эмчит ыраата барбакка үлэлиир сиригэр тупсаҕай оҥоһуулаах дьиэлээҕэ буолар. Дьэ, ол иһин, ити бырагырааманы муҥутаан сайыннара сатыыбыт.
Биир улахан кыайыыбытынан куораттааҕы балыыһа кылаабынай корпуһун, оҕо төрөтөр балыыһаны, оҕо балыыһатын олохтоохтук өрөмүөннээбиппит буолар. Кэнники 5 сыл иһигэр сүҥкэн үлэ барда. Тоҕо диэтэххэ, Саха сирин Ил Дархана Егор Борисов салалтата доруобуйа харыстабылын сайдыытыгар улахан болҕомтотун уурар, үп-харчы көрүллэр.
Биллэн турар, кыһалҕалар суох буолбатахтар.
Ханнык улуустарга, нэһилиэктэргэ саҥа объект урут тутуллуохтааҕар, бастатан туран, материальнай-техническэй өттүн, балыыһа саахалланар кутталлааҕын, төһө эргэтин уо.д.а. итэҕэстэри-быһаҕастары учуоттуубут. Олох да фельдшер-акушер пууна суох олорор нэһилиэктэр эмиэ бааллар. Эбэтэр дьаһалта дьиэтигэр олорон үлэлииллэр. Онон улуустартан киирбит сайаапкалары сиһилии үөрэтэбит, дьүүллэһэбит. Улуустар дьаһалталарын кытары сир, дьиэни тупсаҕай тутуулаах оҥоруу о.д.а. боппуруостарга сүбэлэһэбит, биир тылга кэлэбит. Доруобуйа харыстабылын объектарын тутуу, төһө да өрөспүүбүлүкэ боломуочуйата буолбутун иһин, улуустары кытары боппуруостары бииргэ быһаарар буоламмыт, үлэ тэтимнээхтик уонна хаачыстыбалаахтык барар.
Инникитин учаастактааҕы амбулаториялары уонна балыыһалары тутарга күүскэ үлэлиир былааннаахпыт.
2015 сылга СӨ инвестиционнай бырагырааматын чэрчитинэн маннык объектар тутууларын үбүлээһин көрүлүннэ:
|
Объега |
Ханна |
Куойката |
Бүтүөхтээх болдьоҕо |
Төһө үлэ барда (%) |
|
Перинатальнай киин |
Дьокуускайга |
130 |
2016 с. |
15 |
|
Оҕо анал дьиэтэ |
Дьокуускайга |
150 |
2015 с. |
95 |
|
3 №-дээх поликлиника |
Дьокуускайга |
Сменаҕа 600 киһиэхэ |
2015 с. |
90 |
|
Поликлиникалаах балыыһа комплекса |
Үөһээ Бүлүү с. |
50 куойкалаах, сменаҕа 70 киһиэхэ |
2015 с. |
90 |
|
Эмчиттэр олорор уопсайдара |
Дьокуускайга 150-с кварталга |
|
2016 с. |
85 |
|
Доруобуйа харыстабылын үлэһиттэригэр олорор дьиэ |
Мирнэй к. |
71 квартиралаах |
2015 с. |
70 |
|
Т.П.Дмитриева аатынан оҕо сэллигин санаторийа |
Дьокуускайга |
|
2015 туттарылынна |
|
Фельдшер-акушер пууннара (ФАП) тутуллаллар:
– Үөһээ Дьааҥы улууһун Чэримчэ с. (2015 с);
– Мэҥэ-Хаҥалас улууһун Матта с. (2015 с.);
– Мэҥэ-Хаҥалас улууһун Тиэлиги с. (2015 с);
– Кэбээйи улууһун Кальвица с. (2015 с.);
– Сунтаар улууһун Аллаҥа с. (2016 с.);
– Ньурба улууһун Малдьаҕар с. (2015 с.);
– Мэҥэ-Хаҥалас улууһун Ороссолуода с. (2015 с).
Маннык тутуулар саҕаланыахтара:
– 2015 сылга Бүлүү куоратыгар 73 куойкалаах балыыһа комплекса (1 уочарат — уопсай блога, 26 куойкалаах хирургия отделениета);
– Үөһээ Дьааҥы оройуонун Баатаҕай с. 30 куойкалаах, сменаҕа 80 киһи сылдьар амбулаториялаах терапия уонна оҕо отделениелара.
Комментарии
Авторизация на сайте через социальные сети