Арыгы содула олус улахан: ким суорума суолланар, ким дьылҕата алдьанар, ыал аҕата, ийэтэ суох хаалар, ким эрэ кимниин эрэ охсуһар, эчэтэр, сиэргэ баппат быдьар тылынан үөхсэр... Билигин өлүү-сүтүү, суол саахала, хаайыыга барыы, ыар буруйу оҥоруу, оҕоҕо хаҕыс сыһыан, оҕо көрүүтэ-истиитэ суох сылдьыыта — барыта арыгыттан саҕаланар. Бэрээдэги кэһиини, буруйу сүнньүнэн итирик туруктаах дьон оҥороллорун бэлиэтииллэр.
Манан сиэттэрэн соторутааҕыта Нам улууһугар Н.М. Рыкунов аатынан улуустааҕы киин библиотекаҕа «Нам улууһугар арыгыта суох чөл олох» общественнай түмсүү уонна улуустааҕы дьахтар сэбиэтэ тэрийиилэрэнэн «Решение проблем профилактики алкоголизации населения и несовершеннолетних в Намском улусе» диэн тиэмэлээх «төгүрүк остуол» буолла. Тэрээһиҥҥэ ыччат уонна дьиэ кэргэн политикатын министрин солбуйааччы Алексей Щербаков, Тыа хаһаайыстыбатын министиэристибэтин арыгы атыытын хонтуруоллааһыҥҥа департаменын салайааччы Матвей Лыткин, «Нам улууһа» МТ баһылыгын бастакы солбуйааччы Инна Сивцева, Нам оройуонун прокурорун солбуйааччы Галина Охлопкова, Намнааҕы ИДьО начальнигын солбуйааччы Михаил Кокорев, үөрэх управлениетын сүрүннүүр специалиһа Юлия Ядрихинская, нэһилиэктэр депутаттара, оскуолалар социальнай педагогтара, дириэктэри иитэр үлэҕэ солбуйааччылар, общественнай сэбиэттэр председателлэрэ, түөлбэлэр старосталара уо.д.а. кыттыыны ыллылар.
Кэпсэтии түмүгүнэн улуус, нэһилиэктэр дьаһалталарын дьиэтин уонна кинилэр дьаһайар тэрилтэлэрин чөл олох сирдэринэн биллэрэллэригэр, арыгылааһыны утары охсуһар муниципальнай программалары ылыналларыгар; нэһилиэк дьаһалталара, олохтоохтор, общественнай түмсүүлэр, депутаттар, ИДьО бииргэ үлэлэһэн сокуоннайа суох арыгынан эргиниини («точка», арыгы атыылыыр көҥүлэ суох маҕаһыын, такси сулууспата уонна индрайвер өҥөтө) уодьаганныыр үлэни күүһүрдэллэригэр; улуус бары тэрилтэлэрин, түмсүүлэрин салайааччылара арыгы иһиини утары өйдөтөр, үөрэтэр үлэни ыыталларыгар, тэрийэр тэрээһиннэри арыгыта суох ыытыыны ситиһэллэригэр; республикабыт Ил Дархана, Е.А. Борисов сыл аайы балаҕан ыйын иккис нэдиэлэтин бүтэһик күнүн «Арыгыта суох күн» диэн биллэрбитинэн бары оскуолаларга, үөрэх тэрилтэлэригэр ол чэрчитинэн кылаас чаастары ыыталларыгар; Нам улууһун дьаһалтатын ыччат уонна дьиэ кэргэн политикатын отдела уонна нэһилиэктэр ыччаттарын лидердэрэ арыгылааһыны утары үлэҕэ ыччаты киэҥник хабан кытыннаралларыгар диэн резолюция ылыннылар.
Комментарии
Авторизация на сайте через социальные сети