Бу фестивалы төрүттээбит киһибитинэн Иван Иванович Бушков буолар. Бастакы фестиваль 2003 сыллаахха Бахсы нэһилиэгэр, Наттаабай сайылыгар “Аһаҕас халлаан анныгар” диэн ааттанан ыытыллыбыта. Кэскиллээх дьаһал Саха АССР народнай артыыһа, Саха театрын төрүттэспит биллиилээх театральнай деятель Тарас Павлович Местников төрөөбүтэ 100 сылыгар анаммыта. Онно 4 театр кыттыбыта.
Оттон быйылгы фестивальга барыта 8 народнай театр кыттыыны ылла. Айар талааннаахтар дьоһун түһүлгэлэрин улуустааҕы култуура управлениета, Бахсы нэһилиэгэ, Чурапчытааҕы “Айылгы” култуура уонна духуобунай сайдыы киинэ иилээн-саҕалаан тэрийдилэр. Ону тэҥэ П.М. Решетников кыыһа А.П. Решетникова кыайыылаахтарга уопсайа 100 тыһыынча сууммалаах харчынан бириистэри туруорда.
Фестивальга Дириҥнээҕи народнай театр артыыстара Мария Герасимова “Хаадьы Хабырыыс” кэмиэдьийэтин,“Көөчөөн көрө” театрдар Аркадий Новиков, Туйаара Стручкова айымньыларынан “Маама, мин таптаатым” испэктээкили, Мындаҕаайытааҕы народнай театр коллектива П.Ойуунускай “Ыраахтааҕы ыйааҕа” кэмиэдьийэтин, Амматааҕы народнай театр артыыстара “Мин аатым Туллук” үһүйээнтэн испэктээкили, Майатааҕы народнай театрдар А.Твардовскай “Дом у дороги” поэматынан испэктээкили, Чөркөөхтөөҕү народнай театр коллектива А.И.Софронов-Алампа “Олох оонньуура” 4 оонньуулаах драматын, Алтаннааҕы народнай театр артыыстара Миитэрэй Наумов суруйууларынан “Дэриэбинэм барахсан” испэктээкили, Тааттатааҕы народнай театр оонньооччулара Н.Д. Неустроев “Тиэтэйбит” кэмиэдьийэтин көрдөрдүлэр. Норуот театрыгар күн бүгүн үлэлии-хамсыы сылдьар режиссердар үлэлиир таһымнарын көрүүгэ туһуламмыт фестиваль икки күн устата тиргиччи ыытылынна. Көрөөччүлэр да син балачча сырыттылар. Мантан киирбит үп Бахсы нэһилиэгэр тутулла турар “Сулустар аллеялара” диэн бу нэһилиэк биллиилээх дьонугар анаммыт үйэтитии аллеятыгар ананар.
Дьаһал иккис күнүгэр сарсыарда ССРС уонна СР култууратын туйгуна И.И. Еремеев үлэтин-хамнаһын сырдатар быыстапката тэрилиннэ. Кини Чурапчытааҕы норуот театрыгар 11 сыл устата сцена декорациятын бэлэмнээһиҥҥэ, улахан кээмэйдээх биллэриилэри суруйууга айымньылаахтык үлэлээн-хамсаан кэллэ. Бу быыстапкаҕа Иван Иванович оҥортообут сцена декорацията, мала-сала, макеттара көрдөрүүгэ туруорулуннулар. Кини 20-тэн тахса испэктээкил декорациятын бэлэмнээбититтэн 6-та үрдүк сыанабылы ылан ,“Бастыҥ сценогафия” анал аатынан бэлиэтэммит маны тэҥэ “Бастыҥ худуоһунньук” ааты ылбыт. Республикатааҕы араас хабааннаах куонкурустарга театр ситиһиилэхтик кыттан, кыайыы көтөллөннөн кэлэригэр дьоһуннаах үлэни-хамнаһы тэрийсибит И.И. Еремеевка бу күн, бииргэ үлэлиир коллективын аатыттан үгүс эҕэрдэ, махтал тыллара ананна.
Фестивальга дьүүллүүр сүбэ председателинэн СР үтүөлээх артыыһа, республика народнай театрдарын куратора Николай Николаевич Пономарев үлэлээтэ. Кинини сэргэ Бахсы нэһилиэгин баһылыга Иннокентий Федорович Барашков, Томпо улууһуттан Евгений Владимирович, Ефимов, Чурапчы народнай театрын худуоһунньуга Иван Иванович Еремеев, култуура салалтатыттан Валерий Петрович Герасимов сыаналааһыннарынан, фестиваль кыайыылаахтара уонна анал ааттара быһаарылынна. Онуоха дьүүллүүр сүбэ председателэ Н.Н Пономарев санаатын маннык үллэһиннэ: “Үлэҕэр хайдах сыһыаннаһаҕын, оччонон үлэҥ ситиһиилээх, үтүө түмүктэрдээх буолар. Оттон театр хас биирдии үлэһитэ үлэтигэр бэриниилээх, айымньылаах, түмсүүлээхбуоллаҕына эрэ, театр үлэтэ-хамнаһа ситиһиилэнэр. Онон театр ситиһиитэ -- коллектив бүттүүнүн үлэтин түмүгэ. Бу эйгэ үлэһиттэрэ бука бары дьон-сэргэ сынньалаҥын тэрийиигэ, кинилэр духуобунай өттүнэн сайдалларыгар, быһаччы эттэххэ, көрөөччү хараҕын далыгар үлэлииллэр-хамсыыллар. Сценаны киэргэтииттэн, уотун-күөһүн туруорууттан, музыканан киэргэтии, оруоллары толоруу,көстүүмнэри наардааһын о.д.а. театр ымпык-чымпык бары үлэтин табан наардаатаххына эрэ, көрөөччүгэ дуоһуйууну тиэрдэҕин. Бу кэскиллээх дьаһалбыт норуот театрдарын артыыстара, чуолаан режиссердар үлэҕэ-хамнаска уопут атастаһалларыгар, ыкса ситими тутуһан үлэлииллэригэр ананан тэрилиннэ. Манна Валентина Бурнашева, Валерий Лобанов, Иван Бушков курдук туһунан суоллаах-иистээх режиссердар туруорууларын көрдүбүт. Холобур, “Ийэ сирэ”айымньыны туруоруу сорох идэтийбит театрдар үлэлэриттэн таһыма таһыччы үрдүк.”
Икки күннээх куонкурус түмүгүнэн, “Бастыҥ режиссерскай үлэ” номинация хаһаайынынан Майатааҕы народнай театр режиссера Александра Скрябина ааттанна. Киниэхэ Россия уонна республика үтүөлээх артыыската Аиза Петровна Решетникова уонна кини хаан-уруу аймахтара олохтообут 50 тыһ. солкуобай сууммалаах харчынан бириэмийэтэ туттарылынна. “Бастыҥ эр киһи оруола” анал ааты Алтаннааҕы норуот театрын артыыһа Владимир Ноговицын ылла. Оттон “Бастыҥ дьахтар оруола” аат “Көөчөөн көрө” театр артыыскатыгар Туйаара Стручковаҕа иҥэрилиннэ. “Бастыҥ сценография” хаһаайынынан Тааттатааҕы народнай театр худуоһунньуга Иван Малышев буолла. “Бастыҥ музыканан киэргэтии” номинация Алтаннааҕы народнай театр үлэһитигэр Альберт Неустроевка тигистэ. “Бастыҥ уотунан киэргэтии” ааты Майатааҕы народнай театр үлэһитэ Василий Афанасьев ылла. Номинация бары кыайыылаахтарыгар эмиэ Аиза Петровна уонна кини аймахтара олохтообут 10-нуу тыһыынча сууммалаах харчынан бириэмийэлэрин туттулар.
Искусство биир сүрүн чыпчаалынан ааттанар норуот театрдарын айар үлэлэрин көрүү фестивала үрдүк таһымҥа буолан ааста.
Комментарии
Авторизация на сайте через социальные сети