ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
7 декабря 2015, 10:17

Өймөкөөн уолаттарын “сулустаах чааһа”


Быйыл “Хикари” турфирма тэрийэн ыытар “Кыһын Саха сириттэн саҕаланар” оҕо айымньытын айар куонкуруһа үс сыллаах үбүлүөйүн бэлиэтиир. Бу сылга иккитэ ыытыллар куонкурус көрүҥнэрэ: ырыа, үҥкүү, хоһоон, Хаарчаана таҥаһын күрэҕэ, Саҥа дьыллааҕы эҕэрдэ открытката.

Кыһын Саха сириттэн саҕаланар” фестиваль чэрчитинэн ыытыллыбыт хоһоон ааҕааччылар күөн күрэстэрэ Үүнэр көлүөнэ тетрыгар буолла. Дьоҕус саала иһэ бу күннэргэ оҕо саҥатынан туолан турда. Буолумуна, манна өрөспүүбүлүкэ улуустарыттан уонна Дьокуускай куорат оскуолаларыттан, оҕо саадыттан 116 биирдиилээн кыттааччы уонна 43 кэлэктиип кэлэн кытыннылар.

photoByWidth&id=51313&width=1000

Оҕо уус-уран куонкуруһун тэрийээччитэ Александра Андреева бэлиэтииринэн, ордук элбэх кыттааччы Уус-Алдан, Нам, Кэбээйи улуустарыттан кэлбиттэр.

-- Соһуйуохпут иннигэр, ыраах Өймөкөөн улууһуттан – Тымныы полюһутутан бэйэтиттэн тиийэ кэлэн кыттыбыттара кэрэхсэбиллээх. Гран-при хаһаайыттарынан буолбут оҕолор кулун тутар 23 күнүттэн саҕалаан, 21 күн устата Дьокуускай куорат таһыгар баар “Бэс Чагда” лааҕырга анал путевканан сынньана сытан, аны сааскы “Бриллиантовые нотки” күрэскэ кыттыахтара. Онно Татарстантан уонна Кытайтан сайаапкалар номнуо кэлэн сытар, -- диэн кэпсээтэ Александра Константиновна. Онон кыайыы кынаттаммыт уолаттарбыт аны саас эмиэ бэртээхэй хоһооннору бэлэмнээн, аны уопуттаах дьон быһыытынан кыттыахтара.

photoByWidth&id=51314&width=1000

Дьэ, бу маннык суолталаах тэрээһиҥҥэ кыттыбыт оҕолор кимнээҕий? Руслан Балаев (8 кылаас), Семен Атласов (8 кылаас), Никита Протопопов(8 кылаас),Владимир Сивцев (7 кылаас), Игорь Егоров (6 кылаас) – Томтор орто оскуолатын иһинэн үлэлиир кыраайы үөрэтэр литературнай музей “Поиск” көрдүүр-чинчийэр кулууп чилиэннэрэ. Салайааччы, Россия үтүөлээх учуутала Мария Боярова кэпсииринэн, кулуупка 26 оҕо сылдьарыттан, үксэ уолаттар эбит. Кыайыылаах конкурсаннар быйыл бу кулуупка саҥа дьарыктаналлар. Дьэ уонна киин куорат үһүс сылын бэлиэтиир силистэнэн-мутуктанан эрэр биир чаҕылхай тэрээһинигэр – “Кыһын Саха сириттэн саҕаланар” оҕо уус-уран куонкуруһугар Гран-прини ылар чиэскэ тигистилэр!

Уолаттар куонкурус кыайылаахтарынан буолбуттарын истэн, норуот депутата Василий Местников Ил Түмэн дьиэтигэр оҕолору анаан ыҥыран көрүстэ уонна кинилэргэ кэс тылын эттэ. Арааһа, норуот депутатаоҕолору ыҥыран, анаан атах тэпсэн олорон кэпсэтиитэ Ил Түмэн историятыгар аан бастакы түгэн буолуохтаах. Василий Александрович улуус муниципалитетын баһылыгынан үлэлиир кэмигэр “Өймөкөөн айыҕаттан айдарыылаах оҕолоро” диэн тосхолу олоххо киллэрбитэ.

-- Өймөкөөн дьоно аан бастаан Чысхаан диэн Тымныы уобараһын айан, аан дойдуга Тымныы полюһа баарын биллэрбиппит. Бу брендэни олоххо киллэриини 2000 сылтан саҕалаабыппыт. Ол кэмтэн ыла 15 сыл устата Чысхаан аата дорҕооннохтук ааттанарын, Өймөкөөн тымныы полюһа буоларын туһугар олус күүстээх сырдатар, пропагандалыыр үлэни ыыта сылдьабыт. Кэрэхсэбиллээҕэ баар, бу үлэбитин аны ыччаттарбыт салҕаан, инники күөҥҥэ таһааран, улуустарын аатын ааттаттылар. Бу курдук төрөөбүт Өймөкөөҥҥүтүн өрүү ааттата уонна сураҕырда сылдьыҥ, -- диэн Ил Түмэн народнай депутата Василий Местников Томтор орто оскуолатын оҕолорун ис сүрэҕиттэн эҕэрдэлээтэ уонна уолаттарга хас биирдиилэригэр Махтал суруктары туттарда. Бу кэнниттэн Өймөкөөн улууһун Дьокуускай куоракка бэрэстэбиитэлистибэтин салайааччы Александр Корякин уонна Томтор, Өймөкөөн, Төрүт, Үчүгэй, Сордоҥноох нэһилиэктэрин общественноһын ааттарыттан хас биирдии нэһилиэк бэрэстэбиитэлэ кыайыылаах уолаттары уонна кинилэр салайааччыларын Мария Поликарповна Боярованы ис сүрэхтэриттэн эҕэрдэлээтилэр.

Нөҥүө күнүгэр уолаттарбыт “сулустаах чаастара” салгыы салҕанна – “Кыһын Саха сириттэн саҕаланар” фестиваль айар куонкуруһун кыайыылаахтарын аны “Саха” араадьыйа “Оҕо чааһа” биэриитигэр ыҥырыллан, быһа эфиргэ кытыннылар.

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 630 Источник: Газета "Саха Сирэ" Автор: Елена Потоцкая Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ