Кэккэ биричиинэнэн быйылгы куонкуруска кыттааччы аҕыйах буолан биэрдэ. Ол да буоллар, тэрээһин олус интэриэһинэйдик ааста.
Тэрээһиҥҥэ улуус баһылыга А.В. Григорьев, социальнай боппуруоска баһылыгы солбуйааччы У.Д. Попова, коммерческайа суох тэрилтэлэри кытта үлэлиир отдел салайааччыта С.Б. Алексеева, социальнай-психологическай киин педагог-психолога О.А. Степанова, Сунтаардааҕы технологическай колледж тэрийээччи-педагога З.М. Иванова, ыччат политикатын отделын салайааччы Р.Е. Догойдонов кытыннылар, дьүүллүүр сүбэ быһыытынан кыттааччылары сыаналаатылар.
Куонкурус түмүгүнэн, аатырбыт «Элгээйи бичиэнньэтин» астыыр «Астык» кондитерскай фирма дириэктэрэ Туйаара Иванова III степеннээх дипломунан наҕараадаланна, Сунтаардааҕы киин балыыһа медицинскэй сиэстэрэтэ Сардаана Моисеева II степеннээх диплому ылла. Оттон I степеннээх дипломанынан «Жилкомсервис» ХЭТ суоппара Николай Слепцов ааттанна.
Кыайыылаах аатын ылбыт Николай авиатехник идэлээх. Үс сыл аэропорка үлэлээн баран, ЖКС-ка суоппарынан үлэлии киирбит. «Техникаҕа оҕо эрдэхпиттэн сыстаҕаспын, айанныырбын туохтааҕар да ордоробун» диэн бэйэтин дакылаатыгар кэпсээтэ. Үлэтин-хамнаһын ымпыгын-чымпыгын дьүүллүүр сүбэҕэ билиһиннэрдэ, боппуруостарга сөптөөх хоруйу биэрэн, бэйэтин идэтин, үлэтин, эбээһинэһин толору билэрин дакаастаата.
Эһиилги куонкуруска эдэр дьон көхтөөхтүк кыттыахтара диэн эрэнэбит.
Комментарии
Авторизация на сайте через социальные сети