Манна Алданнааҕы политехникум хомусчуттара хомус алыптаах дьүрүскэнинэн дьон кутун туттулар. Үөрүүлээх тэрээһин кыттыылаахтара политехникум преподавателэ В.А. Сорокина туруоруутугар Д.К. Сивцев-Суорун Омоллоон «Ньургун Боотур» либреттотыттан сценкалары, Альбина Абсатарова (Алданнааҕы гимназия), Айыына Сосина, Аяна Сосина (9 №-дээх оскуола) толорууларыгар саха үҥкүүтүн сэргээн көрдүлэр.
Евгений Зверев (Алданнааҕы гимназия) хос эһэтин, биллиилээх тойуксут Сергей Зверев-Кыыл Уола туһунан кэпсээнин болҕойон иһиттилэр. Умнуллубат түгэнинэн Клара Петровна Кондратьева тойуктааһына, Надежда Семеновна Ушницкая олоҥхолооһуна буоллулар.
Сарсыныгар улуустааҕы библиотекаҕа «Олоҥхону билээччилэр» оонньуу ыытылынна.
Политехникум, лицей, гимназия, оскуола үөрэнээччилэрэ саха үһүйээннэригэр, номохторугар, олоҥхоҕо билиилэрин-көрүүлэрин тургутустулар. Кыайыылааҕынан лицей хамаандата (салайааччы О.Г.Волокитина) таҕыста. Иккис миэстэни политехникум үөрэнээччилэрэ (салайааччы В.А.Сорокина) ыллылар. Алданнааҕы гимназия (салайааччы Н.Е. Тихонова) үһүс буолла.
Олоҥхо күннэрэ «Эпическое наследие народов Якутии: проблемы сохранения, развития и перспективы» научнай-практическай конференциянан түмүктэннэ. Манна Дьокуускайтан, Нерюнгриттан, Алдантан, Хатыыстыыртан, Угоянтан, Аллараа Кураанахтан, Томмоттон 100-тэн тахса киһи кытынна. Конференцияҕа норуот ырыаһыта, культура туйгуна, Олоҥхо театрын артыыһа, олоҥхоһут Валентин Гаврильевич Исаков кыттыыны ылла, тойуктаата, олоҥхолоото, саха, эбээн эпостарын толорууга маастар-кылаастары ыытта.
Комментарии
Авторизация на сайте через социальные сети