Тыа хаһаайыстыбатын биэрэпиһэ, аата да этэрин курдук, бастатан туран, Россияҕа төһө фермер уонна хаһаайыстыба баарын, кинилэр төһө сүөһүлээхтэрэ, уопсайынан, биир ынах төһө үүтү биэрэригэр тиийэ чопчуланыахтаах.
Ылар илии биэрэри сатыахтаах дииллэринии, судаарыстыбаттан төһө субсидияны, кредити уо.д.а. көмөнү ылбыты отчуоттуурга анал пуун баар буолуохтаах үһү.
Уларыйыылар эмиэ бааллар. Холобур, биэрэпис ыйытыыларыттан бас билии көрүҥүн, сири туһаныы быраабын уо.д.а. туһунан боппуруостар таһаарыллыбыттар.
Биэрэпис тыа хаһаайыстыбатын бородууксуйатын оҥорооччуларга эрэ сыһыаннаах буолбатах. Ол курдук, даачалаахтар эмиэ кыттыахтаахтар. Бэл, ким төһө кирээдэни олордубута учуокка ылыллыахтаах үһү. Даача кээпэрэтииптэрэ быраҕыллыбыт учаастактары болҕомтоҕо ылалларыгар тиийэллэр. Төһөлөөх элбэх учаастак докумуоҥҥа киллэриллибэккэ, кадастр учуотугар ыйыллыбакка сири биэрээччилэр уонна даачалаахтар икки ардыларыгар тахсар уустук быһыыны-майгыны таһаарара, баҕар, тохтотуллаарай?
Биэрэпис түмүктэрэ Россия агропромышленнай комплексын судаарыстыба көҕүлүүрүгэр аналлаах миэрэлэри ыларга көмөлөһүөхтээх үһү.
Биэрэпис икки түһүмэҕинэн: от ыйын 1-15 күннэригэр, балаҕан ыйын 15-сэтинньи 15 күннэригэр ыраах сытар улуустарга ыытыллара сабаҕаланар.
Комментарии
Авторизация на сайте через социальные сети