ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
10 июня 2015, 14:47

Аммаҕа оҕо уһуйааннарын иитээччилэрин ыһыаҕа буолла


СӨ Үөрэҕин министиэристибэтэ 2015 сылы оскуола инниннээҕи үөрэхтээһин сылынан биллэрбитэ уонна быйыл оҕо уһуйааннара тэриллибиттэрэ 95 сылын бэлиэтиэхпит. Үөрэх улуустааҕы управлениета итинэн сиэттэрэн, уһуйааннарга уонна уһуйаан иитээччилэригэр аналлаах элбэх тэрээһиннэри тэрийэн ыытар.

photoByWidth&id=36309&width=1000

Ол курдук, ааспыт нэдиэлэҕэ Амма нэһилиэгин сынньалаҥ пааркатыгар улуус бары уһуйааннарыттан 200-тэн тахса киһи ыһыахтыы муһунна. Үгэс быһыытынан, ыһыах сиэрин-туомун тутуһан, алгыстанан, арчыланан, ыһыах уһуйааннар парадтарынан саҕаланна.

Улуус баһылыга Николай Архипов, баһылыгы бастакы солбуйааччы Петр Лебедев, баһылыгы социальнай боппуруостарга солбуйааччы Парасковья Емельянова, үөрэх управлениетын салайааччы Юрий Шишигин, педогогическай наука доктора Мария Прокопьева, СӨ үөрэҕириитин бочуоттаах бэтэрээнэ Матрена Нерлова эҕэрдэ тылларын эттилэр. Кинилэр уһуйааннар үлэлэрэ уопсастыбаҕа улахан суолталааҕын, оҕо дьоҕура, талаана, олоҕун кэскилэ мантан саҕылларын бэлиэтээтилэр уонна билигин информацияны ылыы уонна араас технологиялар сайдыбыт кэмнэригэр оҕо тулалыыр эйгэҕэ бигэтик киирэригэр сүрүн кылааты киллэрэллэрин ыйдылар.

Онтон салгыы кэнсиэр, түһүлгэнэн аһааһын, ирэ-хоро сэһэргэһии буолла. Ыһыаҕы тэрийээччилэр араас куонкурустары, күрэстэри ыыттылар.

photoByWidth&id=36310&width=1000

Сахалыы таҥас көрүүтүгэр Бөтүҥ нэһилиэгиттэн Галина Яковлева уонна Мээндигиттэн бэтэрээн иитээччи Александра Деляева кыайыылаахтарынан буоллулар. Оһуохай күрэһигэр Анна Солдатова уус тыллаах тэтимнээх этиитэ ыһыах дьонун кэрэхсэттэ.

Ыһыахха оҕо иититигэр олохторун анаабыт уһуйаан бэтэрээннэрэ көхтөөхтүк кытыннылар. Үүнэр көлүөнэни үтүө олукка түстүүр дьоһун дьоммут дьоро түһүлгэлэрэ туһалаахтык уонна сынньалаҥнык ааста. Бары үрдүкү салалта өттүттэн оскуола инниннээҕи үөрэхтээһин тэрилтэлэригэр болҕомто улаатан иһэриттэн үөрэн уонна ыһыаҕы тэрийээччилэргэ махтанан тарҕастылар.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 806 Источник: ЯСИА Автор: Иван Дьячковскай Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ