Тыа хаһаайыстыбатын управлениетын начальнига Иван Аргунов чуолкайдаан иһитиннэрбитинэн, дьаарбаҥкаҕа улуус 9 тэрээһиннээх уонна 7 бааһынай хаһаайыстыбалара, 15 ыал кытыннылар. Кулууп иннинэн, аттынан кэккэлээбит массыыналартан ынах, сылгы сүөһү, сибиинньэ эттэрин, куукулалары, сүөһү иһин-үөһүн, кууллаах собону, тоҥ арыыны, кулууп иһигэр бурдук ас арааһын, кондитер астарын, барыанньалары, эт полуфабрикаттары атыылаатылар. Атыы-тутуу бэркэ барда. Улуус киинигэр тэриллибит дьаарбаҥкаҕа «Хоту», «Манчаары», «Мэҥэ», «Лена» кооперативтар, Аллараа Бэстээхтээҕи «Мясной двор» тэрилтэ «От Елены» маҕаһыына, Табаҕатааҕы арыы собуота бородууксуйаларын атыыга аҕаллылар.
Төхтүртэн «Акация» бааһынай хаһаайыстыба салайааччыта Матрена Павлова араас барыанньаны эҥин атыыга туруорбутун таһынан, Калифорния чиэрбэтэ оҥорон таһаарбыт хара буорун (гумуһун) уонна, өссө, ону таһынан, дьаарбаҥкаҕа мээнэ атыыламмат табаары ‒ бэйэтэ этэринэн, «тыһы сылгы» иҥиирдэрин эмиэ атыыга аҕалбытын бэлиэтиэххэ наада. Сылгы иҥиирин былыр былыргыттан туох да булкааһа суох ыраас биэ кымыһын оҥорууга тутталлара биллэр.
Бастаан көрөргө атыылаһааччы аҕыйах соҕус курдук этэ да, ол бары атыылаһа-атыылаһа баран иһэр буоланнар, аҕыйах курдук көһүннэ бадахтаах. Тэрээһин түмүгүн таһаарыыга биир да атыылаһааччы суох этэ, Майа дьонун курдук олохтоохтор түмүгү-тойу кэтэһэ сылдьыбат дьон буолан биэрдилэр. Төһө-хачча сыанаҕа атыылаатылар диэн кыратык эргитэн көрөр буоллахха, холобур, «Хотулар» үүттэрин лиитэрэтин 55-тии, убаҕас сүөгэйдэрин (сливки) 100-тэн 140-нуу, хойуу сүөгэйдэрин (сметана) 120-лии, табаҕалар 14 киилэлээх дьааһык арыыларын 6160-нуу, 20 киилэлээхтэрин 8800-түү, «Еленалар» ыыһаммыт уонна буспут сууламмыт убаһа этин 650-нуу, сүөһү этиттэн кэтилиэттэри киилэтин 350-нуу, сылгы рагутун 110-нуу, ыт аһын киилэтин 60-нуу атыылаатылар диэн элэс бэлиэтээһинтэн ылан көрөбүт. Бу дьаарбаҥкаҕа сүөһү этэ киилэтэ 400-түү солкуобайга атыыланна. Хараттан «Мыла» бааһынай хаһаайыстыба (Дмитрий Назаров) саха боруодата сүөһү этин ити сыанаҕа батарда.
Буоларын курдук, управление үлэһиттэрэ кэрийэ сылдьан, ким тугу төһө сыанаҕа уонна төһөнү аҕалбытын суруннулар, бэлиэтэннилэр. Түмүккэ, барыллаан, 5910 киилэ эт 2 мөлүйүөн 320 тыһыынча солкуобайга атыыланна диэн бэлиэтээтилэр. Онон, атыы-тутуу балачча бара сатаабыт эбит.
Дьаарбаҥка кыттыылаахтарын Аллараа Бэстээх муниципальнай тэриллиитин баһылыгын солбуйааччы Георгий Осипов эҕэрдэлээн туран, дипломнары туттартаата. Бастакы степеннээх диплому Төҥүлүттэн Антон Новгородов, иккис степеннээҕи Балыктаахтан Олег Стручков, үһүс степеннээҕи Бүтэйдээхтэн «Сомоҕо» кооператив баһылыга Роман Попов туттулар. Анал ааттарга тигистилэр: «Эмис эт» (сүөһү этэ) номинацияҕа Дмитрий Назаров, «Халыҥ хаһа» (сылгы этэ) ‒ Илья Птицын, «Сыа сымса эт» (сибиинньэ этэ) ‒ «Дириҥ» кооператив (Екатерина Дмитриева).
Дьаарбаҥкаҕа сылдьан көрбүт-истибит, атыыласпыт олохтоохтор санааларын тиэрдэбит. Оҕо саадыгар сиэстэрэлээн пенсияҕа тахсыбыт Людмила Леонова уонна сибээскэ үлэлээбит, билигин үлэтэ суох Марина Волкова: «Олус үчүгэй тэрээһин буолла. Маннык дьаарбаҥкаҕа сылдьа сатааччыбыт. Сыаналара үгүөрү эбит. Маҕаһыыҥҥа эти киилэтин 450-нуу, 500-түү солкуобайга атыылаһаҕын. Манна буоллаҕына, өссө түһэрсиэххэ да сөп. Айылҕа аһа буоллаҕа, амтана да минньигэс, ыраас даҕаны».
Комментарии
Авторизация на сайте через социальные сети