Министр Аллараа Бэстээххэ элбэх оҕолоох ыалларга ыалдьыттаата

СР ыччат дьыалаларыгар уонна дьиэ кэргэн политикатыгар министрэ Афанасий Владимиров атырдьах ыйын 29 күнүгэр Аллараа Бэстээххэ кэлэн барда.

Ыччат управлениетын начальнига Константин Захаров, Аллараа Бэстээх бөһүөлэгин социальнай үлэһитэ Варвара Бурнашева уонна «Аллараа Бэстээх бөһүөлэгэ» МТ баһылыгын солбуйааччы Павел Яковлев арыаллааһыннарынан, бөһүөлэккэ олорор, үлэлиир түөрт элбэх оҕолоох ыалларга сырытта.
Бастаан биэс оҕолоох эдэр ийэ Людмила Коренева дьиэ кэргэнигэр ыалдьыттаата. Биир сыл анараа өртүгэр Людмила кэргэнэ соһуччу олохтон туораан, огдообо хаалан оҕолорун бэйэтэ иитэр. Улахана 17-лээх, кырата иккитин ааспыт. Ыал ийэтэ почтальоннуур, ону таһынан кини бөһүөлэк олоҕор көхтөөхтүк кыттар, оскуолаҕа төрөппүттэр комитеттарын бэрэссэдээтэлэ эбит. Дьиэлэрин таһыгар оҕуруот аһын арааһын арбуһугар тиийэ олордоллор, оҕолор дьиэ ис-тас үлэтигэр ийэлэригэр көх-нэм буолаллар. Кинилэр тэлгэһэлэригэр сабыс-саҥа дьиэ тутулла турар. Людмила Афанасьевна биэс оҕолоохторго бэриллэр социальнай көмө программатын чэрчитинэн дьиэ туттара сылдьарын туһунан үөрэ кэпсээтэ.
Үлэ ветераннарыгар, өр сыл бииргэ олорбут, «Быйаҥнаах тэлгэһэ», «Саргылаах түһүлгэ» куонкурустар кыайыылахтара, биэс оҕо ийэтэ, аҕата, элбэх сиэн, хос сиэн эбэтэ, эһэтэ Анна, Иннокентий Прибылыхтарга сылдьан, остуол үрдүгэр тобус-толору оҕолор, сиэннэр ситиһиилэрин туоһулуур грамоталар, мэтээллэр хотоһон сыталларын сөҕө көрдө. Прибылыхтар 1985 сыллаахха тутуллубут дьиэлэригэр биэс ыал буолан олороллор эбит. Дьиэ сиҥнэн бүппүт, муостата иҥнэри-таары барбыт. Министр дьиэ кэргэҥҥэ араас программаларга хапсыһарга күүскүтүн түмүөххүтүн наада уонна үүт-хайаҕас булунан дьиэ-уот, уһаайба боппуруоһун эккирэтистэххитинэ табыллар диэн сүбэлээтэ.

Оттон түөрт оҕолоох эдэр ыаллар Вера, Максим Чучиннар тутулла турар икки мэндиэмэннээх таас дьиэлэрин көрө-истэ, кэтии сылдьар курдук аттыгар дьиэ куортамнаспыттар. 2010 сыллаахтан эдэр ыалы дьиэнэн хааччыйыы программаҕа киирсэннэр, этэҥҥэ буоллаҕына, эһиил малааһынныахпыт диэн баҕалаахтар эбит. Ыал ийэтэ Вера субсидияҕа киирсэргэ дохуоттара эппиэттэспэтэҕэр балтараа сыл кэриҥэ, сылаалаах да буоллар, үс үлэҕэ үлэлээбитин кэпсээтэ. Чучиннар олус сэргэх уонна көхтөөх ыаллар. «Төрөппүт эппиэтинэһэ» республикатааҕы күрэхтэһиигэ бастаабыттар уонна СР Ил Дарханын Гранын ылан Анапаҕа баран сынньанан кэлбиттэр. Оҕолорун эмиэ сырдыкка, кэрэҕэ угуйаллар, оскуола общественнай олоҕор кытыннараллар.
Салгыы тоҕус оҕолоох Пугачевтарга сырытта.Ыал ийэтэ социальнай үлэһит Варвара Коммунаровна эппитинэн, кинилэрбаар буоланнар, үгэскэ кубулуйбут культура уонна спорт эстафетатыгар бөһүөлэк бастакы миэстэни ылар чиэскэ тиксибит. Аҕалара Юрий Борисович улуус дьаһалтатыгар харабылынан үлэлиир, тугу барытын сатыыр, үлэтин быыһыгар этэрбэс улларар, иистэнэр массыынаны, алдьаммыт техниканы өрөмүөннүүр эбит. Улахан оҕолор хайыы-үйэҕэ бэйэлэрэ ыал буолбуттар, кыралара ‒ игирэлэр, саҥа хааман эрэллэр. Аллараа Бэстээххэ 25-с кварталыгар уһаайба ыланнар, электро-уот, гаас киллэриллэрин кэтэһэллэр, 7х7 иэннээх дьиэ туттарга былаанныыллар эбит. Олохтоох дьаһалта үлэһиттэрэ элбэх оҕолоох ыалга, оронноро тиийбэт буолан, сорохторо сиргэ утуйалларын көрөннөр, орон бэлэхтээбиттэрин үөрэ, махтана кэпсээтилэр.

‒ Элбэх оҕолоох ыалларга дьиэлэригэр сылдьаммын олус диэн долгуйдум, уонна төһө да ыарахаттары көрүстэллэр, олоххо дьулуурдаах эбит диэн түмүккэ кэллим. Кинилэр күүстэрэ, кыахтара ‒ түмсүүлээхтэригэр сытар. Үөһэттэн тугу даҕаны кэтэһэн олорбокко, олохторун бэйэлэрэ түстүүллэр диэн хайгыы уонна астына көрдүм. Улуустааҕы ыччат уонна дьиэ кэргэн управлениетын үлэһиттэрэ, олохтоох дьаһалта кинилэри кытта ситимнээхтик үлэлэһэн, күүс-көмө буоланнар, сырдыкка көҕүлүүллэриттэн, өйүүллэриттэн үөрдүм. Ыаллары кытта атах тэпсэн олорон кэпсэтии бэйэбит үлэбитигэр эмиэ улахан уопут буолар, - диэтэ министр.
Афанасий Владимиров соторутааҕыта Бүлүү улууһугар эмиэ элбэх оҕолоох ыалларга ыалдьыттаабыта, кинилэр олохторун-дьаһахтарын кытта билсибитэ. Маннык кэрэхсэбиллээх тэрээһиннэри министр салгыы ыытар былааннаах.