Бу улахан тэрээһин үлэһиттэргэ бэйэ-бэйэҕэ доҕордуу сыһыаны үөскэтэр, үҥкүү кэрэ эйгэтигэр угуйар, саҥа талааннары арыйар сыаллаах иккис сылын үрдүк таһымҥа ыытылынна. Балаһыанньа быһыытынан күрэс кыттааччылара Улуу Кыайыы 70 сылыгар анаммыт байыаннай уонна бэйэлэрэ баҕаларынан талбыт үҥкүүлэрин көрөөччүлэргэ бэлэхтээтилэр.
Үөрүүлээх түһүлгэҕэ үҥкүү абылаҥар ылларбыт оҕо тэрилтэлэрин бөлөхтөрө бары ох курдук оҥостон, сир симэҕин курдук симэнэн кэлэн, биир киһи курдук тэҥник хамсанан, араас омук үҥкүүлэринэн мустубут дьону сөхтөрдүлэр. Хас биирдии бөлөх бииртэн-биир тупсаҕай көстүүмнээх, нарын-нарыннык, тэтимнээхтик хамсанан, эргичийэ тэлээрэн көрөөччүлэри ханна эрэ кый ыраах омук дойдуларыгар илэ тиэрдэр курдук сатабыллаахтык үҥкүүлээтилэр.
Күрэс түмүгүнэн, 3-с степэннээх дипломанынан 7-с №-дээх «Сказка» оҕо сайдар киинэ, 2-с степэннээх дипломанын аатын Хоро нэһилиэгин «Кэскил» оҕо сайдар киинин үҥкүүһүттэрэ, 1-кы степэннээх дипломант аатын «Теремок» оҕо сайдар киинин бөлөҕө ыллылар. Маны тэҥэ 3-с степэннээх лауреатынан «Сайыына» Кэнтик оҕо саада, 2-с степэннээх лауреатынан Дүллүкү нэһилиэгин «Кустук» оҕону сайыннарар киин ааттаннылар. Оттон 1-кы степэннээх лауреат буолар үрдүк үөрүүнү 5-с №-дээх «Кэнчээри» оҕо сайдар киинэ билэн, үөрэх үлэһиттэрин идэлээх сойуустарын туруорбут бирииһин ылла.
Итиэннэ саамай-саамай үҥкүүһүт, дьүүллүүр сүбэ үрдүк сыанабылын ылбыт, Гран-при хаһаайыттара буолбут 4-с №-дээх «Сардаана» оҕо саадын нарын-намчы үҥкүүһүт кыргыттарыгар «Дүллүкү нэһилиэгэ» муниципальнай тэриллии анаабыт 10 тыһыынча суумалаах сертификата туттарылынна.
Үрдүк сыанабылга тэҥнээх «Көрөөччүлэр биһирэбиллэрэ» бирииһи Сургуулуктааҕы «Хатыҥчаан» оҕо саада ылан үөрүүлэрэ үксээтэ. Хоротооҕу «Кэскил» оҕо сайдар киинигэр Дүллүкүтээҕи «Кустук» оҕо саада бириис олохтоон туттарда. Үҥкүү түһүлгэтин кыттааччылара бары бириистээх миэстэҕэ тиксэн, астынан, эһиилги күрэскэ сонун үҥкүү кэһиилээх кэлэн күрэҕи киэргэтиэх буолан тарҕастылар.
«Кустук» оҕону сайыннарар киин сэбиэдиссэйэ Лена Никифорова:
- Дүллүкү нэһилиэгин «Кустук» оҕону сайыннарар киин улууска биир айымньылаахтык үлэлиир тэрилтэнэн биллэр. Үлэһиттэрбит элбэх сонун идеяларын олоххо киллэрэргэ туруулаһан үлэлииллэр. Марианна Ивановна Константинова салайар үҥкүү бөлөҕө сүүрбэттэн тахса сыл таһаарыылаахтык үлэлиир, өрөспүүбүлүкэ таһымыгар тиийэ кыттан ситиһиилэринэн үөрдэллэр. Нэһилиэк араас таһымнаах тэрээһиннэригэр биһиги кэлэктиип өрүү кыттан, нэһилиэк биир тутаах тэрилтэтинэн буолабыт.
Бу үҥкүү күрэҕин иккис сылбытын тэрийдибит. Кыттааччыларбыт сыл аайы эбиллэн, үҥкүү кэрэ абылаҥар сыһыннылар диэн бэлиэтээн этиэхпин баҕарабын. Түгэнинэн туһанан, бу күрэххэ быһаччы кыттыгастаах, биһигини өйөөн иккис сылын кыайыылаахтарга уон тыһыынча харчынан бирииһи туруорбут нэһилиэкпит баһылыгар Ан Иван Ивановичка, сүүрбүт-көппүт бэйэм үлэһиттэрбэр тылынан этиллибэт махталбытын тиэрдэбин. Эһиги көмөҕүтүнэн санаабыппыт барыта олоххо киирэр.
Бу киэһэ үҥкүү оройуттан тутулунна, араас омук дойдутун үҥкүүтүн, дьиктиттэн дьикти, кэрэттэн кэрэ хамсаныыларын тыыннаахтыы илэ харахпытынан көрөн, үҥкүү дьикти абылаҥар куустардыбыт. Оҕо тэрилтэтин үлэһиттэрэ чахчы да эргиччи талааннаахтарын бар дьоҥҥо итэҕэттилэр.
Комментарии
Авторизация на сайте через социальные сети