150 выпускниктан 20 оҕо оскуоланы кыһыл көмүс мэтээллээх бүтэрдэ. Томпотооҕу элбэх хайысхалаах гимназияҕа 38 выпускниктан 14-дэ — мэтээл ылла. Бу өтөрүнэн ситиһиллибэтэх үрдүк көрдөрүү. Мэтээл ылбыттар аҥардара уолаттар буолаллара үөрдэр. Советскай Союз Героай Федор Охлопков аатынан Кириэс Халдьаайы орто оскуолатын 32 оҕо бүтэрбититтэн, биэһэ кыһыл көмүс мэтээллээхтэр. Ефим Протопопов аатынан Саһыл орто оскуолатын сэттэ оҕо бүтэрбититтэн биирдэрэ мэтээллээх. Оҕолор бары БКЭ үчүгэйдик туттараннар, оскуолаҕа ылбыт билиилэрэ үрдүгүн көрдөрдүлэр. Кинилэргэ үөрэххэ ураты ситиһиилэрин иһин көмүс мэтээллэри, грамоталары уонна бириэмийэлэри оройуон баһылыга Георгий Герасимов туттарда. Үөрэх управлениетын начальнига Петр Новгородов мэтээллээх оҕолор төрөппүттэригэр эҕэрдэ суруктары туттарда.
Биһиги выпускниктарбыт бары өттүнэн талааннаахтар. Дайаана Потапова үөрэнээччилэр Бүтүн Арассыыйатааҕы олимпиадаларын II-с түһүмэҕэр нуучча тылыгар уонна английскай тылга 1 миэстэни, историяҕа – 2, нуучча литературатыгар – 3 миэстэни ылаттаабыта. Ону таһынан кини ырыаһыт, үөрүүлээх түгэҥҥэ сахалыы уонна английскайды тылларынан икки ырыаны толордо. Богдан Тиянич физикаҕа БКЭ-ни 96 баалга туттарбыт, «Надежда энергетики» Бүтүн Арассыыйатааҕы олимпиада түмүк тууругар математикаҕа, физикаҕа, информатикаҕа кыттыбыта. Футболунан уонна чэпчэки атлетиканан үлүһүйэр. Аня Сироткина нуучча тылын уонна литературатын олимпиадаларын кыттыылааҕа, «Даллан Кэрэ» үҥкүү ансаамбылын солистката, «Мисс Хаандыга» куонкуруска кыайбыта.
Мэтээллээх оҕолору үөрэппит бастыҥ учууталлар эмиэ наҕараадаланнылар.
Оскуоланы бүтэрээччилэр араас үрдүк үөрэх тэрилтэлэригэр туттарсыахтара. Ол курдук, салайыы уонна политика эйгэтигэр, медицинаҕа, промышленноска, экономикаҕа уонна үп үлэтигэр, информационнай технологияларга, культураҕа уонна искусствоҕа сыһыаннаах идэлэргэ салгыы үөрэниэхтэрин баҕараллар.
Комментарии
Авторизация на сайте через социальные сети