Айан суола ыараханыттан чаҕыйбакка, нэһилиэктэртэн барыларыттан толору састааптаах делегациялар кытыннылар. Конференцияҕа бэтэрээннэр республикатааҕы сэбиэттэрин бэрэссэдээтэлэ Будимир Слепцов кыттыбыта, биллэн турар, бэтэрээннэри улаханнык үөртэ.
Сэбиэт бэрэссэдээтэлэ Надежда Атласова отчуотун саҕалыырыгар улуус дьаһалтата бэтэрээннэргэ улахан болҕомто уурбутун, өйөөбүтүн, дьаһалта дьиэтигэр кабинет биэрэн, үлэлиир усулуобуйа тэрийбитин махтанан бэлиэтээтэ. Ол түмүгэр дьаһалтаны кытта ыкса сибээстээхтик үлэлээн, бэтэрээннэр Улуу Кыайыы 70 сылыгар элбэх үлэни ыыттылар.
Ону барытын ахтыбакка, сүрүн хайысхаларга тохтуохха. Ол курдук, нэдиэлэ хас биирдии күнэ аттарыллан, кырдьаҕастар обществоттан тэйбэттэрин наадатыгар, политиканы, үлэни-хамнаһы билиһиннэрэр бэсиэдэлэр, салайааччылары кытта көрсүһүүлэр, чэбдигирдэр, аралдьытар дьаһаллар тиһигин баспакка ыытыллыбыттарын, орто оскуола базатыгар бэтэрээннэри компьютерынан туһанарга үөрэппиттэрин, библиотека үлэһиттэрэ сахалыы киинэлэри көрдөрбүттэрин, улуустааҕы “Хотугу кыым” хаһыат “Каждому ветерану – нашу Звезду”, “Бессмертный полк” акциялары ыыппытын дакылаатчыт эттэ. Оскуолалар, оҕо саадтара бэтэрээннэргэ көмөлөрүн, араас хайысхалаах үлэлэрин бэлиэтээтэ. Ону таһынан бэтэрээннэр тыа хаһаайыстыбатынан, оҕуруотунан, балыктааһынынан күүскэ дьарыктаналлар, бу дьыалаҕа ыччаттарын үөрэтэллэр. Ыытыллар бары дьаһалларга саамай көхтөөх кыттааччылар – эмиэ бэтэрээннэр. Биир да дьаһал кинилэрэ суох барбат. Энтузиаст бэтэрээн Гаврил Игнатьевич көҕүлээһининэн дуобат, саахымат турнира бары нэһилиэктэринэн ыытыллыбыт, ыччат бэйэтин итэҕэлин билэрин инниттэн Александра Чиркова “Итэҕэл иитэр-үөрэтэр тыына” брошюраны бэлэмнээн бэчээттэппит. Кыайыы 70 сылыгар анаан “Саһарбыт хаартыскалар кэпсииллэр”, “Бэтэрээннэр хамсааһыннара – улахан общественнай күүс” альбом-кинигэлэр бэчээттэннилэр. Сыаҥааннаахха оскуола иһинэн музей хос аһылынна. Сыл устата ыытыллыбыт “Салют Победы” фестиваль нэһилиэнньэни бүттүүнүн түмтэ.
Надежда Васильевна кыаллыбатах өрүттэргэ эмиэ тохтоото. Бэтэрэээннэр сэбиэттэрэ юридическай сирэй буолбатаҕа граҥҥа кыттарга мэһэй буолбут. Арчы дьиэтин тутууну салгыы туруорсар наада. Реабилитационнай киин күнүскү көрүҥүн үлэлэттэххэ, кырдьаҕастар доруобуйаларын көннөрөллөрүгэр туһалаах буолуо этэ диэтэ. Ыччаты иитиигэ улахан болҕомтону уурар наадатын тоһоҕолоон бэлиэтэтэ.
Акулина Никулина Кыайыы общественнай фондун үлэтин отчуоттаата. Кини иһитиннэрбитинэн, “Кыайыы” фондугар быйыл улуус олохтоохторо биир күннээҕи хамнастарын - 1 мөл. 200 тыһ. солк. укпуттар. Ханнык тэрилтэ төһө үбүнэн киллэрбитэулуус хаһыатыгарсырдатыллан испитэ.
Салгыы Будимир Дмитриевич республика бэтэрээннэрин сэбиэтин үлэтин сүрүн хайысхаларын кэпсээтэ.
Сылтан сыл бэтэрээннэр кэккэлэрэ чарааһыыр. 5 сыл анараа өттүгэр 770 сэрии кыттыылааҕа баар эбит буоллаҕына, Кыайыы 70 сылын 250 эрэ сэрии кыттыылааҕа көрүстэ. Кинилэртэн саамай эдэрдэрэ 90 саастаах. Тыыл бэтэрээннэрэ – 9000. Кыайыы 65 сылыгар 15 000 этилэр. Билигин кинилэр 80 саастаахтар. Сэрии сылларын оҕолоро 70 саастаахтар. Онон бэтэрээннэри харыстыахха, үйэлэрин уһатыахха. Ыччаты патриотическай тыыҥҥа иитиигэ кинилэр холобурдарын күүскэ туһаныахха. Ыччаты иитиигэ болҕомтонукүүскэ ууруохха. Бэтэрээннэр обществоҕа улахан сабыдыаллаахтар. Күн бүгүн быыбардааччы 41 бырыһыана – бэтэрээн.
Будимир Дмитриевич бэтэрээннэри кытта үлэ сүрүннээн 3 хайысханан ыытылларын эттэ. Бастакыта - бэтэрээннэр социальнай көмүскэллээх буолуулара. Иккиһэ - кинилэри хаачыстыбалаах медицинскэй көмөнөн хааччыйыы. Үсүһэ - ыччаты патриотическай иитии. Кылаабынайа, бэйэбит общественнай хамсааһыҥҥа кыттыахтаахпыт диэн тоһоҕолоон бэлиэтээтэ.
Үп-харчы өттүнэн өйөөһүн икки хайысханан барыан сөбүн эттэ: общественнай тэрилтэ быһыытынан регистрацияланан, граннарга кыттан уонна нэһилиэктэр бюджеттарыгар туспа үп көрүөхтэрин наада.
Салгыы Будимир Дмитриевич Дьокуускайга, киин улуустарга “Школа третьего возраста” кулууптар үчүгэйдик үлэлииллэрин кэпсээтэ. Абый улууһун бэтэрээннэрин сэбиэтин үлэтэ хотугу улуустарга биир үчүгэй үлэлээх общественнай тэрилтэнэн биллэрин эттэ уонна бэтэрэээннэр хамсааһыннарын актыыбынай кыттыылаахтарыгар – Неустроев Владимир Петровичка, Садовников Дмитрий Ивановичка, Ребров Василий Григорьевичка (Сыаҥааннаах), Слепцова Анна Ивановнаҕа (Уолбут), Никулина Акулина Егоровнаҕа, Дохунаева Валентина Николаевнаҕа (Ураһалаах) «Бэтэрээннэр хамсааһыннарын актыбыыстара” бэлиэлэри туттарда.
БаһылыкМихаил Никулин “Гражданская доблесть” бэлиэни Степанюк Галина Егоровнаҕа, баһылык грамотатын уонна хары чаһытын Атласова Надежда Васильевнаҕа, Слепцов Будимир Дмитриевичка, “Абый улууһун бочуоттаах бэтэрээнэ” бэлиэни Дохунаева Анастасия Петровнаҕа туттарда.
Кэпсэтиигэ Ефимов Николай Петрович, Майоров Назар Семенович, Негтягаева Елизавета Васильевна, Слепцов Николай Михайлович, Ильяхова Елена Афанасьевна, Черемкина Елена Николавена кытыннылар. Бэтэрээннэр баар уопсай кыһалаҕалары аһаҕастык эттилэр уонна олору быһаарары турорустулар.
Этиниилэргэ хоруйдаан, Будимир Дмитриевич уонна Михаил Гаврильевич санаа үллэһиннилэр.
Конференция түмүгэр сэбиэт 5 сыллаах үлэтин үчүгэйинэн сыаналаатылар, саҥа састаабы таллылар, алтынньыга буолуохтаах республикатааҕы конференцияҕа делегаттары таллылар.
Сэбиэт бэрэссэдээтэлинэн баһылык Хабарова Анна Николаевна кандидатуратын туруорда. Киниэхэ делегаттар биир киһи курдук куоластаатылар.
Мунньах кыттыылаахтара сэбиэт саҥа састаабын эҕэрдэлээтилэр, айымньылаах үлэни баҕардылар. Бары тутуспутунан уопсай хаартыскаҕа түстүлэр. Салгыы итии чэйдээх остуол тула олорон, сэһэргэстилэр, ырыа иһиттилэр, санаа үллэһиннилэр.
Комментарии
Авторизация на сайте через социальные сети