Оройуон дьаһалтата үс хамаанданы туруорбута профком үлэтэ тэрээһиннээҕин туоһулуур. Сытыы «Дружба» тырылааһынынан, анньыылар биир кэм мууһу көйөр тыастарынан доҕуһуоллатан үлэ күөстүү оргуйда. Бу ылыллыбыт ыраас дьэҥкир муус үтүө санаа аргыстаах. Ол эбэтэр тыыл бэтэрээннэригэр, кырдьаҕастарбытыгар түҥэтиллиэхтээх. Күрэскэ Харыйалаах нэһилиэгиттэн эмиэ кытыннылар.
Биир чаас иһигэр үлэлэрин үмүрүтэн Өлөөнтөн «Хотуканцы» хомуур хамаанда бастаата. Иккиһи айылҕа харыстабылын инспекциятын, үсүһү ОДьКХ хоһууннара ылан харчынан бириэмийэҕэ тигистилэр. Оройуон дьаһалтатын профсоюһа палаатка туруоран, итии чэйинэн, минньигэс аһынан күндүлээтэ.
Саргылаана Алексеева, Өлөөн эбэҥки нэһилиэгин баһылыгын солбуйааччы:
- 2010 сылтан ыытыллар күрэһи ГИМС тэрилтэтин кытта кыттыһан тэрийдибит. Былырыын түөрт хамаанда кыттыбыт буоллаҕына, быйыл 8 хамаанда кэлэн сүргэбит көтөҕүлүннэ. Өрүүтүн кыттар улуустааҕы айылҕа харыстабылын инспекциятыгар, коммунальнай хаһаайыстыбаҕа, Харыйалаах нэһилиэгиттэн Корякиннарга, Соломоновтарга махталбытын тиэрдэбит. Ылбыт муустарын бу нэдиэлэ иһинэн уолаттар кырдьаҕастарбытыгар илдьэн биэриэхтэрэ.
Константин Неустроев, тыа хаһаайыстыбатын управлениетын начальнига:
- Сарсыарда тымныы курдук этэ да, кэнники ирэн барбыппыт. Олус үчүгэй күрэхтэһии буолла. «Дружбабыт», туттар сэппит-сэбиргэлбит барыта бэйэбит киэнэ. Ыччаппыт үчүгэйдик үлэлиирэ биһиги профкоммут үлэтигэр көстөр дии саныыбын. Сылаас чэйинэн, аһынан-үөлүнэн көрүстүлэр. Тэрийбит дьоҥҥо махталбытын тиэрдэбит.
Андрей Симонов, улуустааҕы ГИМС начальнига:
- Бу тэрээһини биһиги Өлөөн-Харыйалаах мууһунан сырыы аһыллыбытынан итиэннэ РФ Ыксаллаах быһыыга-майгыга министиэристибэтэ тэриллибитэ 25 сылыгар аныыбыт. Манна муус ылалларыгар хамаанда уолаттара сэрэхтээх буолалларын көрөбүт-истэбит, халыҥын кэмниибит. Дьаһалта исписэлииһэ Христофор Васильевтыын түмүгү таһаардыбыт, судьуйалаатыбыт.
Ити курдук үтүө санаалаах хоту дойду хоһууттара өрөбүл күннэригэр ытык кырдьаҕастарбытыгар хотулуу үгэһинэн көмөлөстүлэр, тэрилтэлэринэн сомоҕолостулар, айылҕаларыттан күүс-уох ыллылар.
Комментарии
Авторизация на сайте через социальные сети