Кэбээйи Мукучуттан, Уус Алдан Дүпсүнүттэн, Бүлүүттэн, Үөһээ Бүлүү Кырыкыйыттан, Сунтаартан ватсап ситимигэр киирэн, "Кулуһун куорсуна" бөлөххө түмсүбүттэр истиҥ, иһирэх көрсүһүүлэрэ үлүскэннээх үөрүүнү бэлэхтээбитэ чахчы.
Айар дьоҕурдаах дьон буччум санааларын хоһоон гынан көтүтэллэригэр, сайа этэллэригэр, туоххаһыйбыт, тууйуллубут санааны-оноону салгын хоту сайҕыылларыгар кыаҕы үөскэтэр “Тобуруокап көмүс күһүнэ” тэрээһин бастакы күнүгэр долгулдьуйа устар Бүлүү Эбэ биэрэгэр Даркылаах кэрэ-мааны сиригэр араас санааны эҥсэн этэр элбэх хоһоону ааптардар аахтылар, чөллөркөй, чуор куоластаахтар ылбаҕай ырыаны көҕүлүттүн ыллылар. Бу күн тэрийээччилэр көҕүлээһиннэринэн, тэрээһин кыттыылаахтара собо миинин буһарыыга илин-кэлин түһүстүлэр, муҥхаһыт биригээдэлэр сыа балыгы хото атыылаатылар. Оҕолорго, улахан дьоҥҥо анаммыт оонньуу, көр-нар, ырыа-тойук хойукка диэри дуораһыйда.
Иккис күн "Түөрт строка" күрэстэһиитигэр, тылбаас киэһэтигэр ыраахтан-чугастан кэлбит дьон олус көхтөөхтүк кытыннылар, ирэ-хоро кэпсэттилэр. Сүргэни көтөҕөр, санааны кынаттыыр, дууһаны ыллатар хоһооннору, тылбаастары, ырыалары истэн дуоһуйбуттара, санаалара сырдаабыкка, кэҥээбиккэ, үрдээбиккэ дылы буолбута кыратык да саарбахтаммат.
Комментарии
Авторизация на сайте через социальные сети