Бу туһунан биһиэхэ улуустааҕы киин библиотека директора Варвара Окоемова иһитиннэрдэ.
«Куонкуруска уопсайа 40-тан тахса киһи бэйэлэрэ суруйбут кэпсээннэринэн, хоһооннорунан уонна сценкаларынан кытыннылар. Быйылгы куонкуруска олохтоох уонна республика хаһыаттарыгар суруйар биллэр-көстөр ааптардары кытта тэҥҥэ эдэрдэр, суруйарга холонооччулар көүн көрсүбүттэрэ тэрээһини улаханнык сэргэхситтэ. Күрэстэһээччилэр ортолоругар кинигэлэрдээх, республикаҕа ааттара-суоллара киэҥник биллибит Татьяна Находкина, Уйбаан Бахсылыырап курдук сытыы бөрүөлээхтэр кыттыбыттара улаханнык кэрэхсэнэр. Кинилэр санааларын, тылларын-өстөрүн истээри эдэрдэр ордук хото кэлбиттэрэ сүргэни көтөхтө.
Түмүккэ, кэпсээн суруйуутун куонкуруһугар кыттыбыттарга 1 миэстэни туох да мөккүөрэ суох Татьяна Находкина (Тумул) «Ытык иэс махтала» айымньытынан ылла. Иккис бочуоттаах миэстэҕэ Чэриктэй олохтооҕо Марфа Соловьева «Хара көстүүм уонна холорук» кэпсээнинэн таҕыста. Үһүс бочуоттаах миэстэни «Ытыс буор сылааһа» кэпсээнинэн Иван Попов (Хомустаах) ылла.
Онтон хоһоонньутарга туһаайан эттэххэ, ордук дьахтар аймах ылсан иһэр диэн эрэллээхтик этэбин. Ону «Уһуктуу» диэн айар дьоҕурдаах дьахталлар кулууптара тэриллибитэ да туоһулуур. Быйылгы күрэстэһии кыайыылааҕынан Чараҥ олохтооҕо, культура эйгэтин үлэһитэ, сайдар кэскиллээх Екатерина Свинобоева ааттанна. Иккискэ Александра Жиркова (Бэйдиҥэ), үһүскэ Раиса Сивцева (Дүпсүн) таҕыстылар.
Сценканы суруйууга дьүүллүүр сүбэ быһаарыытынан икки миэстэ олохтонно. Кими кыайыылаах оноробут диэн толкуйга түһүү кэнниттэн, Данил Макеев («Чолбон сурунаал кылаабынай редактора) бэрэссэдээтэллээх дьүүллүүр сүбэ кыайыылааҕынан Василий Бурнашеву (Хомустаах) ааттаата. Иккиһи Екатерина Свинобоева ылла. Екатеринаҕа быйылгы куонкурус быйаннаах буолла. Маныаха эдэр киһи айар үлэнэн утумнаахтык дьарыктаныыта үчүгэй түмүктэри аҕалла. Түгэнинэн туһанан, биһиги Уйбаан Бахсылыырапка махтаныах тустаахпыт. Кини биһиги библиотекабыт бары тэрээһиннэригэр куруук көмөлөһөр, сүбэ-ама буолар, өйүүр эрэллээх доҕорбут. Бу да сырыыга көрдөһүүбүтүн ылынан, дьүүллүүр сүбэҕэ хоһооннору сыаналаата, санаатын үллэһиннэ», -- диэтэ Варвара Николаевна.
Куонкурус кыайыылаахтарыгар ытыс тыаһыгар доҕуһуоллатан дипломнар, сертификаттар уонна сыаналаах бэлэхтэр туттарылыннылар. Бастыҥ үлэлэр «Мүрү саһарҕата» улуустааҕы хаһыакка бэчээттэнэллэрин олохтоохтор долгуйа кэтэһэллэр. Куонкуруһу тэрийиигэ улуустааҕы киин библиотека, «Уһуктуу» айар дьоҕурдаах дьахталлар кулууптара, «Мүрү саһарҕата» ТПО, «Чолбон» сурунаал редакцията үлэлэстилэр.
Түмүккэ, куонкурустаһааччылар уонна тэрийээччилэр аныгыскы сырыыга оскуола үрдүкү кылааһын оҕолоро кытталларыгар баҕараллар. Онуоха учууталлар уонна төрөппүттэр улахан болҕомтолорун уурдахтарына, сүдү күүс буолуо этэ диэн эрэнэллэр. В.Н.Окоемова этэринэн, дьоҕурдаахтары буларга аныыр куонкурустарын сыллата сайыннаран, кэҥэтэн иһэр соруктаахтар.
Комментарии
Авторизация на сайте через социальные сети