Павловскайдар быйыл оҕуруот аһын хото ыспыттар. Быйыл былааннарын 113 бырыһыан толорбуттар, онон 247 гектар ыһыыламмыттар. Былырыын 210 гектар ыһыылаахтар эбит. «Саҥа олох», «Приленскэй» агрофирма, Петр Егоров, Спартак Попов, Семен Тимофеев, Анна Яковлева, Семен Васильев хортуоппуйу, хаппыыстаны, моркуобу, сүбүөкүлэни, «Ан» бааһынай хаһаайыстыба итиннэ эбии арбуз, тыква, дыня олордубуттар.
Нэһилиэккэ 330 000 кв. м иэннээх оҕуруот аһын теплицаҕа ыспыттар, онон эмиэ суоттаммыттарыттан аһары толорбуттар.
Сүөһүгэ эбии аһылыкка анаан «Ой Бэс» - 45, «М. Егоров» ХЭУо - 20, Семен Максимов 6 гектарга күөх үүнээйини ыспыттар.
Быйыл нэһилиэк 2300 тонна оту оттуур былааннаах. Ааспыт сылга 270 тонна от куруламмыт. Өрүскэ уу кэмигэр түһэн арыыларга от үчүгэйдик үүммүт. Билиҥҥитэ 100 тонна кэбиһиилэммиттэр.
«М. Егоров» ХЭУо 4 трактордаах, 5 үлэһиттээх (салайааччы Петр Шамаев) толору механизациялаах звенота алаастарын оттоон бүтэрэн номнуо арыыга киирэн оттуур, бу күннэргэ кэбиһиилэрин туруорар былааннаахтар.
«Төрүт» ХЭУо (салайааччы Михаил Петров) окко турунарга бэлэмнэнэр. «Төрүттэргэ» үһүс сылын эдэр ыччат звенота тэриллэн үлэлиэҕэ. Толору механизациялаах звенону Марк Оконешников салайыаҕа. Ыччаттар баҕа өртүлэринэн оттуурга бэлэмнэр. Хаһаайыстыба 150 тонна оту оттуур былааннаах, күн-дьыл туран биэрдэҕинэ ону аһары толорорго суоттаналлар.
Отчуттарга улахан кыһалҕа суох эрээри, өрүс арыыларыгар окко техниканы көһөрөн киллэрэргэ паромҥа балай эмэ үп-харчы эрэйиллэр. Хаһаайыстыбалар бэйэлэрэ уйуналлар. Олохтоох дьаһалта, былырыыҥҥы курдук, көмөлөһөргө сорунар.
Үүт собуота ирдэбилгэ эппиэттэспэт буолан сабыллан турбута сыл буолбут. «Манчаары» ТХПК салалтата үп булбакка, өрөмүөн үлэтэ ситэ ыытыллыбакка турар. Онон хаһаайыстыбалар үүттэрин «Хоту» ТХПК илдьэн туттара олороллор. «Манчаары» ТХПК үүт таһар массыыната саамай үүт үгүөрүтүк ыаныллар кэмигэр күн өрүү-өрүү кэлэн үүт-ас аһыйар түгэннэрэ тахсыталаабыттар. Ол да буоллар олохтоохтор 216,5 тонна былааннаахтарыттан 263 тоннаны туттарар соругу туруоруналлар. Былырыын 337 тонна үүтү туттарбыттара.
Комментарии
Авторизация на сайте через социальные сети