Кэрэ айылҕатынан, ханна да суох ураты ыраас салгынынан, халлааҥҥа харбаһар адаар хайаларынан, дохсун сүүрүктээх өрүстэринэн, сэдэх кыылларынан, үүнээйилэринэн аатырар Муома –– эбээн улуу дьоно – бастакылартан бастакылара төрөөбүт-үөскээбит дойдулара буолар.
Эбээн бастакы суруйааччыта, Эһэлээх нэһилиэгиттэн төрүттээх Николай Саввич Тарабукин син-биир нууччаларга А.С. Пушкин, сахаларга А.Е. Кулаковкай курдук норуотугар бастакы айымньылары айан, төрөөбүт тыла сайдарыгар, уран тыла олоҕурарыгар сүдү кылааты киллэрбитэ.
Догдо уола Василий Дмитриевич Лебедев төрөөбүт түөлбэтин тылын чинчийэн эбээннэртэн аан бастаан наука кандидата буолбута. Бу тыл билимэр бастакы суолу тэлии этэ.
Ураты кэрэ куоластаах эбээн бастакы мелодиһа Петр Николаевич Старков эбээн ырыатын-үҥкүүтүн киэҥ эйгэҕэ таһаарбыта, эбээн норуотун искусствотыгар саҥа сүүрээни киллэрбитэ.
Эбээн чулуу дьахтара Евдокия Николаевна Бокова аан дойдутааҕы норуоттар икки ардыларынааҕы көрсүһүүлэргэ эбээн норуотун аатын дорҕоонноохтук ааттаппыта, оҕону иитиигэ-үөрэтиигэ дьоһун үлэни оҥорбута, норуотун ииһин-ууһун киэҥник тарҕатар, элбэх ырыа тылын-мелодиятын айар, бэйэтэ ыллыыр.
Усуйаанаттан төрүттээх эбээн бастакы романист дьахтара Мария Прокопьевна Федотова өр сылларга Муома оройуонугар олорон айар-тутар, үүнэр көлүөнэҕэ эбээн тылын пропагандалыыр. Дьэ, кырдык даҕаны, аҕыйах ахсааннаах эбээн норуотун дьоһун дьоно Муома сириттэн-уотуттан үүнэн-сайдан тахсыбыттара.
Эбээн норуота эстибэтин туһугар былыр-былыргыттан төрүт дьарыга –– табаны иитии сайдыан наада. Итини тэҥэ оҕону кыра сааһыттан төрөөбүт тылыгар утумнаахтык үөрэтии төһүү күүс буолуох этэ. Манна даҕатан эттэххэ, эбээннэр түөлбэлээн олорор Сааһыыр бөһүөлэктэригэр "Осикат" оҕо уһуйааныгар уонна Н.С. Тарабукин аатынан Улахан Чыыстай орто оскуолатыгар эбээн тылын уонна литературатын үөрэтэллэрэ хайҕаллаах. Итини тэҥэ бу нэһилиэккэ таһаарыылаахтык үлэлиир көс оскуола, таба иитиигэр туһуламмыт оҕо сайыҥҥы лааҕырдара, "Һэку", "Һонҥачан" ансамбллар, Чыбааҕылаах нэһилиэгэр "Удин" оҕо ансамбла эвен норуота охтон-самнан биэрбэт дьүккүөрдээҕин көрдөрөр.
Хас биирдии норуот –– кыра да, улахан да –– күн сириттэн симэлийиэн баҕарбат, тус эйгэтин харыстаан уһуннук олоруон баҕарар. Онно туораттан мэһэй эрэ кыттыспатар.
Комментарии
Авторизация на сайте через социальные сети