Бүгүн Павловскайга нэһилиэк историятыгар киирэр бэлиэ күн буолла

Ахсынньы 29 күнүгэр, саҥа 2016 сылы көрсө Мэҥэ-Хаҥалас улууһун Нөөрүктээйи нэһилиэгэр историяҕа киирэр бэлиэ күн буолла. Олохтоохтор өр сыллаах ыра санаалара туолан, саҥа, сылаас, сырдык, таас оскуола үөрүүлээхтик аһылынна. Кырдьык даҕаны, киһи хараҕа хатанар, республика үрдүнэн ханна да суох эриэккэс бырайыактаах үс мэндиэмэннээх 350 миэстэлээх оскуоланы үлэҕэ киллэрии – күн-түүн нэһилиэнньэтэ улаата турар Павловскай бөһүөлэгин бары олохтоохторугар дьоһун бэлэх.

Саха АССР үтүөлээх учуутала, РСФСР норуот үөрэҕириитигэр туйгуна, тыыл, үлэ ветерана Василий Николаевич Оконешников аатын сүгэр саҥа оскуола символическай күлүүһүн «Электромонтаж» ХЭТ генеральнай директора Василий Пинигин оскуола директорыгар Валерий Петровка туттарда.
СР Правительствотын бэрэссэдээтэлин солбуйааччы Алексей Дьячковскай, СР үөрэҕин министрэ Феодосия Габышева, улуус баһылыга Николай Старостин, үөрэх управлениетын начальнига Ирина Черкашина, Нөөрүктээйи нэһилиэгин баһылыга Николай Федоров, «Кыһыл сулус» уордьан кавалера, оскуола выпуснига, технология учуутала Иван Степанов уонна үөрэх туйгуна Уля Аргунова үөрүүлээх быһыыга-майгыга аалай лиэнтэни быстылар. Күүтүүлээх күнү уруйдаан алгысчыт Кулан аал уоту оттон айах тутта.

Оскуола үлэһиттэрин, үөрэнээччилэрин, нэһилиэк олохтоохторун үтүмэн үөрүүлэрин үллэстэ бу дьоро күн республика Ил Түмэн Государственнай мунньаҕын сис комитетын бэрэссэдээтэллэрэ Александр Романов, Юрий Николаев, СР архитектураҕа уонна тутууга министрин солбуйааччы Галина Новикова, СР ааҕар-суоттуур аудитора Владимир Птицын, Государственнай Дума депутата Михаил Николаев көмөлөһөөччүтэ Матвей Мучин маанылаах ыалдьыттарынан буоллулар.
Нөөрүктээйигэ оскуола төрүттэммитэ 140 сылынан уонна саҥа кэрэ көстүүлээх, аныгы ирдэбилгэ толору эппиэттиир саҥа оскуола аһыллыбытынан оскуола кэккэ педагогтара бочуоттаах бэлиэлэринэн наҕараадаланнылар. «Гражданскай килбиэн» бэлиэ Александра Федороваҕа, СР Правительствотын грамотата Тамара Нестероваҕа, РФ Үөрэҕин министерствотын Бочуотунай грамотата Анна Борисоваҕа, Татьяна Скрябинэҕэ туттарылынна. «Учууталлар учууталлара» ааты Иннокентий Никитин, СР үөрэҕириигэ ситимин бочуоттаах ветерана ааты Галина Кычкина, «СР үөрэҕириигэ туйгуна» ‒ Елена Атласова, Андрей Попов, Наталья Николаева, Екатерина Прибылых, Матрена Иванова, Зинаида Старостина, «Саха сирин эрэлэ» ааты Анна Васильева сүктүлэр.
Бу күн Саха Республикатын Правительствотын аатыттан саҥа оскуолаҕа алын кылаастар лабораторияларын үөрэнэр тээбириннэрин, Үөрэх министерствотыттан токарнай станок, улуус дьаһалтатыттан 100 тыһыынча солкуобайдаах сертификаттары туттардылар.

СР Правительствотын Бэрэссэдээтэлин солбуйааччы Алексей Дьячковскай СР Ил Дарханын аатыттан нэһилиэк, улуус олохтоохторун дьоро күнүнэн эҕэрдэлээтэ. СР үөрэҕин министрэ Феодосия Габышева уон сыл иһигэр улууска 10 саҥа оскуола тутуллан үлэҕэ киллэриллибитэ улахан кыайыынан буолар, үөрэх хаачыстыбатын тупсарыыга үлэлэһэргэ саҥа, сылаас сырдык оскуолаҕа үчүгэй усулубуойа тэрилиннэ диэн эттэ.
Улуус баһылыга Николай Старостин оскуоланы тутууга үгүс сыраларын биэрбит дьоҥҥо, чуолаан Ил Түмэн депутаттарыгар махталын тиэртэ уонна республикаҕа биллэр архитехтордары, тутааччылары иитэн таһаарбыт В.Н.Оконешников аатын дьоһуннаахтык сүгэр оскуолаттан элбэх үтүө дьон үүнэн тахсыаҕа диэн баҕа санаатын эттэ. Дьокуускайга олорор биир дойдулаахтарбыт «Дойду ситимэ» түмсүү аатыттан Владимир Птицын оҕолор дьарыктаналларыгар теннистиир остуолу бэлэх уунна. Государственнай Дума депутатын көмөлөһөөччүтэ Матвей Мучин академик В.П.Ларионов аатынан мэтээли оскуола учууталыгар Александра Осиповаҕа туттарда.
Үөрэнээччилэр ааттарыттан оскуола лидерэ, 9-с кылаас үөрэнээччитэ Саша Скрыбыкин: «Ыра санаа оҥостубут үйэлээх оскуолабыт тутуллуутугар күүс-көмө буолбут дьоҥҥо истиҥ махталбытын аныыбыт, оскуолабытын маанылаан, харыстыы сылдьыахпыт, үөрэхпитигэр өссө кыһаллыахпыт», ‒ диэтэ.
Тэрээһин үөрүүлээх чааһыгар үөрэнээччилэр оскуола гимнин толордулар. Бу күн араас сылларга оскуоланы бүтэрбиттэр, ветеран учууталлар, көлүөнэлэр көрсүһүүлэрэ тэрээһиннээхтик ыытылынна.