- Кыра саастаах оҕолортон саҕалаан улахан дьоҥҥо тиийэ, баҕалаахтары ырыаҕа уонна музыкальнай инструменнарга оонньуурга үөрэтиэхтэрэ, профессионал-виртуоз музыканнар оҕолору кытта бииргэ кэнсиэр көрдөрүөхтэрэ. СӨ бастакы Президенэ Михаил Николаев педагогтары, төрөппүттэри оҕо музыка эйгэтигэр уһуйуллан улаатарыгар болҕомтону ууралларыгар этэр. Музыка - оҕо инники сайдыытыгар, эйгэни билиитэ-көрүүтэ кэҥииригэр тирэх буоларын ыйар. Кини көҕүлээн, бу тэрээһин чэрчитинэн Дьокуускай куорат музыкаҕа испэсэлиистэрэ 6 улууска сылдьан оҕолорго уонна улахан дьоҥҥо маастар кылаастары көрдөрүөхтэрэ, үөрэтиэхтэрэ.
Ол курдук, Евдокия Карманова салайааччылаах Дьокуускай куорат Оҕо айымньытын дыбарыаһын уонна 1 нүөмэрдээх оҕо музыкальнай оскуолатын педагогтара Амматааҕы А.Черемных аатынан оҕо музыкальнай оскуолатыгар хорунан ыллааһыҥҥа уонна норуот инструменнарыгар маастар кылаастары ыыттылар. Манна нэһилиэк оскуолаларын алын уонна орто сүһүөх кылаастарын оҕолоро уонна музыка учууталлара кытыннылар. Надежда Попова хорунан ыллааһыҥҥа дьарыктаата, Ирина Романова, Людмила Белолюбская норуот инструменнарыгар оонньуурга үөрэттилэр.
Ирина Романова:"Дьокуускай куорат 1 нүөмэрдээх оҕо музыкальнай оскуолатыгар үлэлиибин. Оҕолору баяҥҥа оонньуурга үөрэтэбин. Педагог быһыытынан үлэлээбитим 38 сыл буолла. Биһиги оскуолабыт улуус оскуолаларын кытта ыкса сибээстэһэн үлэлиир. Ол курдук, Аммаҕа үлэбинэн иккис сырыым. Дэриэбинэ оҕолоро куорат оҕотугар тэҥнээтэххэ, сэргэхтэр, билэ-көрө сатыыллара уһулуччу, кинилэри кытта үлэлииргэ интэриэһинэй",- диэн санаатын үллэһиннэ.
Комментарии
Авторизация на сайте через социальные сети