Дьон үксүн кредити түргэнник ылар баҕаттан баан ирдэбилигэр улаханнык ааҕайбакка, докумуоҥҥа илии баттыырга күһэллэр. Ити түмүгэр ылбыт харчыларыттан икки, үс төгүл элбэх сууманы төлүүллэр. Бу сөп дуо? Сокуоннай дуо? Халаан ылыы дуу?
Баан ирдэбилинэн, усулуобуйатынан кредити ылар киһи хайаан да страховкаланыахтаах. Ол гынан баран, клиент страховкаланарын, страховкаламматын бэйэтэ быһаарыахтаах. «Харчыны төннөрөр Киин» («Центр Возврата Денег») Саха сиринээҕи филиала баан тарыыбын бэрэбиэркэлээн көрбүтүн түмүгэр, кинилэр страховкалара уон төгүл ыарахана биллибит. Хомойуох иһин, бу дьоҥҥо туох да үтүөнү оҥорбот. Оһолго түбэһэн инбэлиит эбэтэр үлэтэ суох буолар түгэннэригэр туох да көдьүүһэ суоҕа биллэр.
350 тыһ. солк суумалаах кредиккэ страховка төлөбүрэ 72 800 солк. тэҥнэһэр эбит. Ол аата ыйдааҕы страховка 1400 солк. буолар. Оттон страховой хампаанньа сылга баара-суоҕа 1400 солк. ылар. Ол эбэтэр түөрт сылга 5600 солк. буолар. Кыһыылааҕа диэн баан киһиттэн 72 800 солк. буор-босхо ылбытыгар тэҥнэһэн тахсар.
Билигин билэр-көрөр дьон баантан кредит ылан баран, «Харчыны төннөрөр Кииҥҥэ» докумуоннарын биэрэн, ону суутунан быһаартаран, страховка иһин төлөөбүт харчыларын төннөрөллөр.
Эксперт санаата
«Харчыны төннөрөр киин» Саха сиринээҕи филиалын салайааччы Ольга Попова:
– Бүгүҥҥү күҥҥэ «Харчыны төннөрөр Киин» («Центр Возврата Денег») филиала Россия 40 регионугар үлэлиир. Суукка 7600 дьыаланы кыайан, дьоҥҥо страховка харчытын төннөрдүлэр.
Биһиги филиалбыт Саха сиригэр тэриллибитэ сыл буолан эрэр. Бу кэмҥэ дьоҥҥо хас да тыһыынча кэриҥэ босхо сүбэ-ама биэрдибит. Бу элбэх үлэттэн тахсар.
Бүгүҥҥү күҥҥэ сүбэни-аманы төлүөпүнүнэн биэрэр кыахпыт суох. Ол иһин нэһилиэнньэттэн киирэр ыйытыылар эппиэттэрин сайтпытыгар таһаарабыт эбэтэр офиска кэллэхтэринэ быһааран, сүбэлээн-амалаан биэрэбит. Ол гынан баран, манна биири өйдүөххэ наада. Страховка харчытын хайаан да төннөрөбүт диэн буолбатах, тоҕо диэтэххэ, бааннар юридическай өттүнэн көмүскэллээх буолаллар.
Биһиги суукка баан страховканы кредит ылааччыларга өҥө быһыытынан буолбакка, булгуччулаах ирдэбил быһыытынан киллэрэн төлөтөрүн дакаастыыбыт.
Биһигиттэн сүбэ-ама ылбыт киһи бааҥҥа албыннатан эбии харчыны хаһан да төлүө суоҕа. Киин сүрүн сыала-соруга – ити буолар.
Комментарии
Авторизация на сайте через социальные сети