Бастатан туран, өрөспүүбүлүкэҕэ буруйу оҥоруу туругун туһунан этэр буоллахха, ааспыт сыл бу кэминээҕитин кытта тэҥнээтэххэ, кыра үрдээһин (0,4 %-нан) бэлиэтэнэр. Буруйу арыйыы 75,9 % буолбут (74,8 % этэ). Өлөрүүнү арыйыы 98 %, киһини ыараханнык эчэтэн, сэрэҕэ суохтан өлүүгэ тиэрдиини арыйыы – эмиэ 98 %. Буруйу оҥоруу Аллайыахаҕа, Үөһээ Бүлүүгэ, Орто Халымаҕа, Өлөөҥҥө элбээбит.
Өрөспүүбүлүкэ прокурора Анатолий Подласенко иһитиннэрбитинэн, уруккаттан уорууну арыйыы мөлтөх эбит буоллаҕына, быйылгы көрдөрүү тупсубут – 57,9 %. Өскөтүн урукку өттүгэр, сүрүннээн, суотабай төлөпүөннэри уоруу баһыйар эбит буоллаҕына, билигин бэлэсипиэттэри уонна баан картатыттан харчыну уоруу элбээбит.
Прокурордар хамнаска улахан иэстээх судаарыстыбаннай да, чааһынай да тэрилтэлэри “кутуруктарын үчүгэйдик эрийээччилэр”, бу хайысханан үлэ тиһигин быспакка ыытыллар. Ол курдук, бу сыл аҥарыгар 309 мөл.солк.суумалаах иэһи төлөттөрбүттэр, ол эрэн, өссө да 169 мөл.солк. иэстээх 51 тэрилтэ баар. Итинтэн 12 мөл.солк. – Нерюнгри куоракка.
Коррупцияны утары охсуһуу үлэтигэр прокуратура бэрэбиэркэтин матырыйаалларынан 14 холуобунай дьыала тэриллибит. Экономика эйгэтигэр саамай криминальнай ынан бюджет эйгэтэ буоларын өрөспүүбүлүкэ прокурорун бастакы солбуйааччы Айдар Иванов бэлиэтээтэ. Көрүллүбүт үбү-харчыны атын сыалга туттуу, иҥэринии, хорон сиэһин – барыта 12 холуобунай дьыала тэриллибит.
Бу сыл бастакы аҥарыгар сокуоннай саастарын ситэ илик оҕолорго туһуланан 526 буруй оҥоһуллубут (576 этэ). Итинтэн аҥара – алимены төлүүртэн куотунуу дьыалалара.
Вера МАКАРОВА суруйуута уонна хаартыскаҕа түһэриитэ.
Комментарии
Авторизация на сайте через социальные сети