– Үтүө күн буолуохтун, бүгүн манна кэлбит Сунтаар нэһилиэгин тэрилтэлэрин бас-көс салайааччылара, ыал-дьыттара, колледжпыт тутаах үлэһиттэрэ уонна студен-нар! Бүгүн улууспутугар идэни биэрэр кыһабытыгар, колледжпыт олоҕор-дьаһаҕар эмиэ биир үөрүүлээх, олус долгутуулаах, улууспут дьонугар-сэргэтигэр кэтэһиилээх, күүтүүлээх историческай түгэни бэлиэтээри муһуннубут, – диэн саҕалаата үөрүүлээх чааһы колледж директорын солбуйааччы М.А.Семенова.
Бу кэлэн турар сирбит уруккута 23 №-дээх СПТУ үөрэнээччилэрэ, билиҥҥитэ колледж студеннара суоппар идэтин баһылаары, маны таһынан дьон-сэргэ төлөбүрдээх «В», «С», «Е», «Д» категорияларга үөрэнэн, суоппар быраабын ылаары массыына ыытар маҥнайгы үөрүйэхтэрин барар автодромнара. Билиҥҥи кэм саҥа ирдэбиллэригэр толору эппиэттиир курдук суол араас бэлиэлэрэ туруоруллубуттар, массыынаны ыытар суол хаачыстыбалаахтык бетоннаммыт.
Инникитин элбэҕи эрэннэрэр алгысчыт Зоя Михайлова бэйэтин курдук үп-үрүҥ таҥастаах кыталык кыргыттары, дуолан уолаттары арыаллатан киирэн, автодроммутун ыраастаан, арчылаан ыллаата-туойда, Үрдүк Айыылартан көрдөстө. Ити кэнниттэн кыргыттарбыт, уолаттарбыт саҥыйахтаах алаадьынан, уохтаах быырпаҕынан кэлбит ыалдьыттары айах туттулар.
Бастакы тыл бэриллэр Сунтаардааҕы технологическай колледж директорыгар Т.Д.Казаковаҕа:
– Бастатан туран, бу саҥа автодром үлэҕэ киириитигэр көмөлөспүт, туппут дьоммутугар-сэргэбитигэр, салайааччыларбытыгар улаханнык махтанабыт. Сунтаарга маннык автодром суох буолан, бэйэлэрин массыыналарын ыытар баҕалаах дьон быраабы кыайан ылбакка эрэйдэнэллэр. Билигин аныгы ирдэбилгэ толору эппиэттиир автодром тутуллубутунан, лицензия ылыахтаахпыт. Бу саҥа тутуу өссө эрдэ үлэҕэ киириэхтээҕин үбэ-харчыта хойутаан түспүтэ. Тендергэ хотон, автодрому туппут Д.А.Афанасьевка улаханнык махтанабыт. Биһиги студеннарбыт даҕаны кҥмҥлҥрҥ улахан. Итини сэргэ эмиэ улахан махталбытын тириэрдэбит билигин улуус дьаһалтатын баһылыгын солбуйан олорор М.М.Прокопьевка, киин нэһилиэкпит баһылыга Э.Е.Филипповка.
Саҥа автодрому аһан, туора тардыллыбыт уһун кыһыл лиэнтэни улуус дьаһалтатын баһылыгын солбуйааччы М.М.Прокопьев, олохтоох дьаһалта аҕа баһылыга Э.Е.Филиппов уонна колледж директора Т.Д.Казакова сытыы кыптыыйынан быһа кырыйаллар. Уруй-айхал, ыһыы-хаһыы ортотугар бастакы массыына киирэн, бетоннаммыт суол устун эргийэн тахсар.
Эҕэрдэ итии-истиҥ тылларын эттилэр: М.М.Прокопьев, улуус дьаһалтатын баһылыгын эбээһинэһин толорооччу, Э.Е.Филиппов, Сунтаар нэһилиэгин баһылыга, Ф.Э.Павлов, «Сунтаравтодор» генеральнай директора.
Сөрүүн халлааҥҥа балачча уһуннук туран дьагдьайбыт ыалдьыттарга, колледж студеннарыгар анаан остуолларга тардыллыбыт ас арааһыгар ыҥырдылар. Колледж минньигэс астаах повардара ас арааһын бэлэмнээбиттэрэ ыалдьыттары сөхтөрдө. Халлаан тымныйан, кырылаччы кыынньыбыт быырпаҕы амсайааччы аҕыйах буолла. Ол оннугар үгүстэр минньигэс амтаннаах саламааты, саҥыйахтаах алаадьыны, үтэһэлээх эти, куурусса буутун астына сиэтилэр. Дьэ, ити курдук Сунтаар улууһун бары дьонугар-сэргэтигэр, ордук сыллата араас техниканы атыылаһар дьон массыына ыытар быраабы ылалларыгар биир быһаарар оруоллаах саҥа автодром үөрүүлээх быһыыга-майгыга аһылынна.
Комментарии
Авторизация на сайте через социальные сети