ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
10 июля 2015, 14:43

Мэҥэ олоҥхоһутугар Аркадий Захаровка аналлаах ахтыы кинигэ сүрэхтэниитэ буолла


От ыйын 9 күнүгэр, Мэҥэ Хаҥалас Майатааҕы киин библиотекатын саалатыгар, быйыл 80 сааһын туолбут кырдьаҕас олоҥхоһут Аркадий Михайлович Захаровка аналлаах «Олоҥхону утумнааччы Аркадий Захаров» диэн ахтыы кинигэ сүрэхтэниитэ үөрүүлээх быһыыга-майгыга буолан ааста.

Ытыктанар олоҥхоһукка аналлаах саҥа кинигэ тахсыбытынан Мэҥэ Хаҥалас улууһун баһылыгын солбуйааччыта Иван Птицын,  культура уонна духуобунай сайдыы управлениетын салайааччыта Сергей Холмогоров  истиҥник эҕэрдэлээтилэр уонна улууска олоҥхо сайдарыгар улахан кылааты киллэрбитин бэлиэтээн Махтал сурук уонна бэлэх биэрдилэр. Өссө Дьокуускайга  олоҥхоһуту чиэстээһин буолуохтааҕын туһунан эттилэр.

Дьокуускайтан кэлбит Республикатааҕы Олоҥхо Киинин салайааччыта Елена Проподьяконова кинини бэйэтэ олоҥхо айааччы, үрдүк таһымнаах толорооччу буоларын таһынан өссө эдэр олоҥхоһуттары уһуйааччы быһыытынан үрдүк сыанабылы биэрдэ. Олоҥхо Ассоциациятын аатыттан Махтал сурук уонна анал бэлэх туттарда. Оттон Арчы дьиэтин хаһаайката Валентина Бочонина уонна филогогическай наука доктора Василий Илларионов Ноорой курдук талааннаах олоҥхоһукка уһуйуллубутун бэлиэтээн туран, бу бэртээхэй кинигэ саха дьонун олоҥхо кэрэ эйгэтигэр угуйа турарыгар баҕардылар.   Сахалыы таҥаһын кэппит аатырбыт Ноорой олоҥхоһут сиэнэ Анисья Степанова  эҕэрдэлээн туойан иһитиннэрдэ.

Мэҥэ бастыҥ олоҥхоһута  төһө да 80 сааһын туоллар, билигин даҕаны эдэрдии ырыа-тойук аргыстаах, өйө-санаата ыраас, дууһата өрүү эдэр, олоххо тардыһыыта күүстээҕиттэн киэн тутталларын бэлиэтээн туран, биир дойдулаахтара, аймахтара, төрөппүт оҕолоро, сиэннэрэ  ахтыы кинигэ тахсыбытынан итиитик-истиҥник эҕэрдэлээтилэр уонна айар үлэтэ хаһан да  аҕыраабатыгар баҕардылар.

Түмүгэр Аркадий Михайлович кинини кэлэн эҕэрдэлээбит дьоҥҥо туһаайан махтал тыл этэригэр: «Эһиги үтүө алгыс тылларгыт миэхэ төһүү күүс буолан, сааһырбыппын аахсыбакка өссө да күүһүм-уоҕум кыайарынан олоҥхолуом дии саныыбын» -- диэтэ уонна бэйэтин олоҥхотуттан быһа тардан ыллаан иһитиннэрдэ. Хас биирдии кэлбит киһиэхэ кинигэтин бэлэхтээн үөртэ.

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 841 Источник: ЯСИА Автор: Иван Осипов Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ