Риторика уонна ритмика куруһуогар оҕолору лааҕыр начальнига, СР ыччат политикатыгар туйгуна, оскуола эбии үөрэхтээһиҥҥэ педагога Василий Аммосов дьарыктыыр. Лааҕыр икки этэрээттээх. Бастакы этэрээт хамандыыра – 7 "в" кылаас үөрэнээччитэ Андрей Мярикянов, оттон иккис этэрээккэ 10 "а" кылаас үөрэнээччитэ Пана Ефимов хамандыырдыыр.
Оҕолор күн солото суох сарсыарда 9 чаастан күнүс 3 чааска диэри оскуолаларыгар кэлэн дьарыктаналлар. О.И. Слепцова салалталаах оскуола остолобуойугар күҥҥэ үстэ тото-хана аһыыллар. Сарсыардааҥы аһылыкка хааһыны, үүт миинин, эбиэккэ толору комплегы – миини, торуойу, хомпуоту, түөртүүргэ бурдук аһын, фруктаны сииллэр. Лааҕыр аһыгар-үөлүгэр быйыл 135 тыһ. солк. көрүллүбүт.
Лааҕыр оҕолоро оройуоҥҥа биллэр-көстөр дьоннуун көрсөр санаалаахтар, итини таһынан Хонуу бөһүлэгин кэрэ-бэлиэ миэстэлэригэр, сэриигэ кыргыспыт биир дойдулаахтарын мемориалларыгар сылдьыахтарын, кинилэр олорон ааспыт историяларын сиһилии үөрэтиэхтэрин баҕараллар.
Ааспыт нэдиэлэҕэ олохтоох полиция сокуоннай саастаахтарын ситэ илик оҕолорго инспекторын И.И. Павлованы кытта көрсүбүттэр. Инна Ивановна оҕолорго бэрээдэги кэһиини сэрэтэр бэсиэдэ оҥорбут. Итини тэҥэ оскуола медигэ В.Р. Тарабукина доруобуйаны харыстааһыҥҥа, чөл олоҕу тутуһууга лекциятын истибиттэр. "Биһиги лааҕырбыт полицияны уонна киин балыыһаны кытта биир сибээстээхтик үлэлиир", – диир лааҕыр начальнига Василий Васильевич.
Бэс ыйын 12-гэр – Россия күнүгэр – оҕолор төрөппүттэрин кытта көрсүһүү тэриллибит. Бу күн лааҕырга оҕолор Российскай Федерация, Саха Республикатын символларын – гиэрбэ, гимн, былаах суолталарын өссө төгүл хатылаабыттар. Төрөппүттэрин кытта көр-нар, интелектуальнай оонньуу ыытыллыбыт.
Лааҕырга күннэтэ араас көрдөөх оонньуулар, пионерболга күрэхтэһии, спортивнай куоталаһыылар тиһигин быспакка ыытыллаллар. Оҕолор сибэкки олордон, ону көрө-истэ сылдьаллар. Төрөөбүт күннээх оҕолору эҕэрдэлээн, кинилэргэ анаан ырыаны-үҥкүүнү толорор, открытка оҥорон бэлэхтиир эбиттэр. Английскай тылга ситиһиилэммит оҕолор лингвик диэн бэлиэни ылаллар. Бу куруһуокка оҕолор "Мин дьиэ кэргэним", "Үүннэрэр оҕуруотум астара", "Сөбүлүүр харамайым", "Саха национальнай бырааһынньыга – Ыһыах", о.д.а. тиэмэлэргэ бырайыак оҥорон кэпсииллэр, английскай тылларын байыталлар. Бу, биллэн турар, оҕолорго инникитин улаханнык туһалыа.
Дьэ ити курдук, лааҕыр "тигинэччи" үлэлиир. Билигин оҕолор Улуу Кыайыы 70 сылыгар аналлаах оройуон Ыһыаҕын сиэригэр-туомугар кыттаары бэлэмнэнэ сылдьаллар. Кинилэр "Осикат" этно-культурнай кииҥҥэ Ирина Ивановаҕа сылдьан бэлэмнэнэллэр, лааҕырдарын начальнига Василий Васильевич ыытар риторика уонна ритмика куруһуогар утумнаахтык дьарыктаналлар.
Лааҕыр бэс ыйын 25 күнүгэр үлэтин түмүктүөҕэ.
Комментарии
Авторизация на сайте через социальные сети