Күҥҥэ тоннаттан тахсаны ыылларын ыанньыксыт Иван Пономарев кэпсиир:
‒ Күннэтэ ыанньыксыттар биирдии бэйэлэрэ 2-лии центнертэн тахса үүтү ыыллар. Үс ыамнаахпыт ‒ сарсыарда алтаҕа, онтон уоҥҥа уонна киэһэ сэттэ чааска ыыбыт. Ордук элбэх үүтү сарсыарда ылааччыбыт.
Титиик иһигэр ыыр аппарааттар үүтү оборон сыбырҕата тураллара. Ынахтар быыстарыгар төрөппүттэрин кытта кэлсибит кыра оҕолор бытырыыстаһа сылдьаллар. Биир обургу уол ынах эмиийин сото олорор. Фермаҕа Иван Пономаревы сэргэ Радмира уонна Татьяна Громовалар, Туйаара Десяткина, Анна Титова үлэлииллэр. Бу ыанньыксыттартан Иван Иванович, Радмира Сергеевна уонна Туйаара Капитоновна Павел Шарин аатынан республикатааҕы аппараатынан ыаһын куонкуруһугар Моҕоллойго эдэр ыанньыксыттар ортолоругар бастаан тураллар. Ол тэтимнэрин ыһыктыбакка, өлгөм үүтү ылар туһугар кыһаллан үлэлии сылдьаллар.
‒ Сайылыкка ыам ыйын 17 күнүгэр тахсыбыппыт, ‒ диэн салгыы кэпсиир Иван Пономарев. ‒ Ыалынан аахтахха, Эбэ Түгэҕэр 8 дьиэ кэргэн буолан сайылаан олоробут. Үүппүтүн үүт массыыната тиһигин быспакка кэлэн куттан барар. Уот бардаҕына Балыктаахха ыыталлар.
Иван Пономарев үлэтин усулуобуйатын астынарын этэр. «Түөрт сайыҥҥы ыйга бириэмийэ көрүллэр, хамнас да тыа киһитигэр үгүөрү», ‒ диэбитэ. Хаһаайыстыбаҕа үлэлээбитэ үһүс сыла эбит. Икки сыл арыыһыттаабыт. Үлэһиттэр дьиэ тутталларыгар салалта көмөлөһөрүн махтана бэлиэтиир.
Комментарии
Авторизация на сайте через социальные сети