Ол саҕалааһына олоххо киирэн, олоҕу сырдыктык, ыраастык ылынар аҕам саастаах дьон үҥкүү тула тоҕуоруспуттара. Кэрэни кэрэхсэтэн, үтүөнү үксэтэн, кэнчээри ыччакка холобур буолан уонна доруобайаларын бөҕөргөтөн айар талаан умсулҕаныгар уйдарбыттара. Нам улууһун Партизан бөһүөлэгэр ытыктанар, убаастанар, кырыйдыбыт диэн сүөм түспэккэ, олох сүпсүлгэнигэр тэҥҥэ хардыылыыр аҕа саастаах дьон, «Хомус» кулуубун иһинэн куруһуок быһыытынан үҥкүү бөлөҕүн тэрийбиттэрэ. Үҥкүүнү, биллэн турар, эдэр-сэнэх, чэгиэн-чэбдик эрэ киһи толорор дии саныыбыт. Баҕа барытын кыайарын туоһулур дьоммут «Көмүлүөк» ветераннара буолаллар. Эбээлэр бастакы «Кытыйалаах» үҥкүүнү туруорараннар, дьон биһирэбилин ылыахтарын ылбыттара.
Ол кэмтэн ыла уопсайа 8 үҥкүүнү туруоран, улуус, өрөспүүбүлүкэ иһигэр биир тарбахха баттанар аҕа саастаах дьоммут үҥкүүлэрин бөлөҕө буоллулар. Араас таһымнаах кэнсиэрдэргэ , улуус ыһыаҕын көтүппэккэ, бары биир сомоҕо буолан, өрүү көхтөөхтүк кытталлар, Аҥардас сахалыы үҥкүүнэн эрэ буолбакка араас омуктар үҥкүүлэрин эмиэ үөрэ-көтө толороллор. Ансаамбыл салайааччыта Семен Герасимович Алексеев култуура эйгэтигэр үлэлээбитэ 25 сылын быйыл туолар. Биллэн турар, култуура үлэтэ элбэх сыраны ирдиир. Кини суох кэмигэр эдэр сааһыттан үҥкүүнү аргыс оҥостобут, ытыктанар эбээ Любовь Даниловна Муксунова үҥкүүнү бэлэмнээн өссө чочуйан биэрэр. Үҥкүүгэ эҥинэ бэйэлээх таҥас-сап олус наада буолар. Хас биирдии үҥкүү тус-туһунан көстүүмнээх, истииллээх буолар. Манна эбээлэр истэригэр идэтийбит иистэнньэҥнэр баар буоланнар, таҥаска-сапка ыарахаттары көрсүбэттэр. Иистэнньэҥнэр Розалия Васильевна Зыкова, Федора Николаевна Новгородова көстүүмнэри тигиигэ өҥөлөрө улахан. Эбээлэр биир кэмҥэ мустан үҥкүүлүүр таҥастарын истиилин, хайдах дьүһүн барсарын быһаарсан кэбиһэллэр. Бука бары олус эппиэтинэстээхтэр, хаһан да тоҕоостоох кэмҥэ «барбат эбиппин»,«кыттыбаппыт» диэн буолбат. «Көмүлүөк» ветераннар түмсүүлэрин үҥкүүһүттэрэ ханнык баҕарар киһиэхэ үрдүк холобуру биэрэллэр. Партизан нэһилиэгин, Нам улууһун киэн туттуулара буолаллар.
Бу ансаамбыл тэриллибит сыллар усталарыгар үҥкүүһүт эбээлэр дьаныһан, өйдөрүн-санааларын, күүстэрин-уохтарын, кыахтарын, ууран туран бириэмэлэрин аахсыбакка үҥкүү кэрэ эйгэтигэр уһуйуллан, дьон-сэргэ үөрүүтүн үксэтэн, эбээлэр кыраһыабайдык хамсанан үҥкүүлээн наҥнаһан бардахтарына ким сөбүлээбэт буолуоҕай... Баҕарабын хас биирдиигитигэр кытаанах доруобуйаны. Кырыйдыбыт дэнэн олохтон туора турбакка, олох орто сүнньүн тутан бигэтик этэҥҥэ хардыылаан иһэргитигэр, оҕолоргут-урууларгыт, сиэннэргит ситиһиилэрэ үөрдэ турдунар! Бар дьоҥҥут махталлара, тапталлара , истиҥтэн-истиҥ сыһыаннара эһигини угуттаатынар, сахалыы сайаҕас санааҕытынан, атастаргытын-доҕотторгутун арыаллаан үҥкүү алыптаах эйгэтигэр өссө да өр кэмҥэ дайа сылдьыҥ!
Санатан эттэххэ, түгэнинэн туһанан, эбээлэр, култуура ыарахан үлэтиттэн соло булан кинилэрдиин дьарыктанар салайааччыларын Саха өрөспүүбүлүкэтин култууратын туйгунун Семен Германовиһы үбүлүөйдээх сааһынан уонна култуура эйгэтигэр үлэлээбитэ сүүрбэ биэс сылынан эҕэрдэлииллэр! Баҕараллар доруобуйаны, үлэҕэ өссө үрдүк кэрдииһи дабайарыгар!
“Үҥкүүһүт эбээлэр» бөлөхтөрө
Алексеев Семен Германович – уус уран салайааччы
1 Муксунова Любовь Даниловна- салайааччы көмөлөһөөччүтэ
2 Колесова Нина Ивановна
3 Свинобоева Анастасия Егоровна
4 Турантаева Мария Павловна
5 Аргунова Людмила Афанасьевна
6 Зыкова Розалия Васильевна
7 Новгородова Федора Николаевна
8 Делигразова Анна Васильевна
9 Иванова Люция Семёновна
10 Кривошапкина Анна Н иколаевна
11 Бурнашева Светлана Васильевна
12 Едукина Марфа Семёновна
13 Зыранова Варвара Егоровна
Комментарии
Авторизация на сайте через социальные сети