- Бүгүн, от ыйын 1 күнүгэр, “Сахамедиа” республикатааҕы медиа-кииҥҥэ СР Предпринимательство дьыалатыгар уонна туризмы сайыннарыыга министерствота Соҕуруу Корееттан сылдьар делегацияны кытта көрүстэ. Манна университеттар профессордара, политологтара бааллар. Көрсүһүүгэ “Ленатурфлот” ХЭТ тэрийэр Өлүөнэ өрүс устун Полярнай эргимтэни туоруур тур, күһүн аайы ыытыллар “Саха сиригэр бриллиантовай нэдиэлэ” тур, ыт көлүүрүнэн айанныырга үөрэтэр оскуолатын туһунан кэпсээтилэр.
- “Саха сиригэр 40-тан тахса турагенстволар уонна туроператордар үлэлииллэр. Кореяны кытта туризм өттүнэн сыһыаммыт сылын ахсын күүһүрэр. Саха сириттэн үгүс киһи сынньана уонна эмтэнэ бу сайдыылаах дойдуга айанныыр. Ол эрээри Кореяттан биһиги сирбитин-уоппутун кытта билсэ кэлэр киһи аҕыйах. Онон бу сырыыгытыгар көрбүккүтүн-истибиккитин дойдугутугар баран тарҕатыаххыт диэн эрэнэбит, оччотугар Саха сиригэр сынньана кэлиэн баҕалаахтар элбиэхтэрэ”, -- диэн СР предпринимательствотын дьыалатыгар уонна туризмы сайыннарыыга министри солбуйааччы Лена Курбаналиева эттэ.
- Көрсүһүүгэ суруналыыстар Россияҕа санкция биллэриллибитин түмүгэр, Саха сиригэр кэлэр турист ахсаана аҕыйаабытын бэлиэтээн туран: “Эһиги туристаргыт санкцияттан сылтаан Саха сиригэр кэлэллэрин туттунуохтара дуо?”, -- диэн ыйыттылар.
- Маныаха профессор Ким Мин Янг: “Саха сирин кэрэ айылҕатын уонна интэриэһинэй олоҕун-дьаһаҕын туһунан билэр баҕабытын ханнык да санкция уҕарытыа суоҕа”, -- диэн эппиэттээтэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети