Саҥа дьыл бырааһынньыгын көрсө «Мегафон» хампаанньа Саха сиринээҕи салаатын бэрэстэбиитэллэрэ уонна суруналыыстар Дьокуускай куорат Бүлүүлүүр суолугар баар анал коррекционнай оскуолаҕа ыалдьыттаатылар. Өрүү буоларын курдук, илии тутуурдаах, өттүк харалаах тиийдибит. Бу сырыыга дьүлэй, кулгаахтарынан, харахтарынан мөлтөхтүк истэр-көрөр уонна хараҕа суох оҕолорго анал кинигэлэри, тифлобыһаарыылаах уонна субтитрдаах киинэлэри бэлэх ууннубут.
Бу оскуолаҕа күн бүгүн 220 оҕо ааҕарга-суруйарга үөрэнэрин таһынан, орто оскуола бырагырааматын толору баһылаан, бэл Хотугулуу-Илиҥҥи федеральнай университекка уонна тыа хаһаайыстыбатын академиятыгар салгыы үөрэнэр кыахтаналлар. Оскуола-интэрнээккэ куорат оҕолорун сэргэ Үөһээ Бүлүүттэн 10, Ньурбаттан 9, Сунтаартан 8, Уус-Алдантан 5, Тааттаттан 8, Мэҥэ-Хаҥаластан 8, Бүлүүттэн 7 уонна да атын улуустартан иккилии-үстүү оҕо үөрэнэр.
Оҕолор Брайль ньыматынан кинигэни доргуччу ааҕарга үөрэнэллэрин таһынан, өссө компьютеры баһылыыллар, ыллыыллар, үҥкүүлүүллэр, тренажернай саалаҕа хото дьарыктаналлар.
- Бу саас «Мегафон» хампаанньа «шоудаун» диэн теннискэ маарыҥныыр анал остуолу бэлэхтээбитэ. Остуол тенниһиттэн уратыта диэн, тула өттө күрүөлээх, мээчик атын сиргэ куоппат, ону ааһан тыастаах. Онон сирдэтэн оҕолор оонньууллар», – диэн учууталлар кэпсээтилэр. Кырдьык, бу оонньууну оҕолор биһирээбиттэрэ тута көстөр. Хас перемена ахсын кэлэн оонньууллар эбит.
Бу оҕолор доруобай дьонтон туох да уратылара суох. Арай харахтара көрбөт. Онон, биир саастыылаахтарын кытары тэҥҥэ сылдьалларын, алтыһалларын, сайдалларын туһугар интэрнээт-оскуола бары күүһүн уурар.
Комментарии
Авторизация на сайте через социальные сети