От ыйын 23 күнүгэр Нөөрүктээйи нэһилиэгэр аймах-билэ дьоно, чуолаан Геннадий Оконешников сүүрэн-көтөн, буойуну ийэ буоругар аҕалан сиэри-туому тутуһан кистээтилэр.
2010 с. Баатара нэһилиэгиттэн сэриигэ баран геройдуу охтубут Игнатий Назарович Попов кырамтатын ирдиир-көрдүүр этэрээт булан дойдутугар аҕалбыттара. Онон иккис буойун Сахатын сиригэр эргиллэр чиэстэннэ.
Буойуну кытта бырастыылаһыы миитинэ Моҕотой Аартыга диэн сэриигэ аттаммыт сирдэригэр буолла. Биир дойдулаахтара, аймахтара, СР Ыччат дьыалаларыгар, дьиэ кэргэн политикатыгар министрин бастакы солбуйааччы Гаврил Семенов, СР кырдьаҕастарын Ытык сүбэтин бэрэссэдээтэлэ Люлия Григорьева, оройуон салалтатыттан Иван Птицын, ветераннар улуустааҕы сэбиэттэрин бэрэссэдээтэлэ Маргарита Максимова о.д.а. сүгүрүйэн аастылар. Бу алааска буойуттарга анаан сэргэ, мэҥэ таас туруоруллубуттар.
Оконешниковтар кийииттэрэ Людмила Оконешникова Николай туһунан сиһилии кэпсээтэ. Дэки аҕатын ууһуттан төрүттээх, 1916 с. төрөөбүт. Оҕо эрдэҕинэ «Бэһиккэ» диэн хос ааттаах эбит. Сэриигэ барыан иннинэ «Саҥа олох» холкуоска туруу үлэһит быһыытынан үүнэн испит, кэргэннэммит эрээри, хомойуох иһин, оҕото суох. Сэриигэ 1943 с. сураҕа суох сүппүтүн туһунан төрөппүттэрэ биллэриини туппуттар. Егор, Евдокия Оконешниковтар 5 уолаттарыттан түөртэрэ Василий, Николай I, Николай II, Егор сэриигэ ыҥырыллыбыттар. Бырааттыылартан Бэһиккэ эрэ эргиллибэтэх.
Дьокуускайтан республика кырдьаҕастарын сэбиэтин бэрэссэдээтэлэ Будимир Слепцов Аҕа дойду Улуу сэриитин кыттыылаахтара Михаил Попову, Петр Конкины кытта кэлэ сырытта. «Быйыл Кыайыы 70 сылынан Россияҕа, республикаҕа сэрии кыттыылаахтарын ааттарын үйэтитэр, билигин баар ветераннарга болҕомтону уурар тэрээһиннэр ыытылыннылар. Ыам ыйын 9 күнүгэр 250 сэрии ветерана биһиги ортобутугар олорон Кыайыы бырааһынньыгын көрүстэ Саха сириттэн 30 000 буойун кыргыс толоонугар үйэ саас тухары хаалбытыттан Игнатий Попов уонна Николай Оконешников эрэ эргиллэр кыахтаннылар. Онон бу түгэн сүҥкэн историческай суолталаах, кэриэстэбиллээх. Санааларын ууран туран үлэлэһэр ирдиир-көрдүүр этэрээттэр кыһамньыларынан үгүс сыллар усталарыгар Саха сириттэн 120 сураҕа суох сүппүт буойун кырамтатын, медальонун булбуттара. Хомойуох иһин, кыайан аҕаллыллыбатахтара, ол эрээри бары чиэһинэн-бочуотунан бырааттыы көмүүгэ көмүс уҥуохтара көтөҕүллүбүтэ. Эдэр көлүөнэҕэ Кыайыыны аҕалсыбыт буойуттар туһунан өйдөбүнньүк үйэ-саас тухары хаалыаҕа», ‒ диэн эттэ.
Дьокуускай куорат кырдьаҕастарын сэбиэтин бэрэссэдээтэлэ Михаил Попов сэриигэ сылдьан буойун хайдах балаһыанньаҕа сураҕа суох сүтэр суоһар түгэннэрин чуолкайдык көрбүтүн ахтан ааста. Ирдиир-көрдүүр этэрээттэр историяны сөргүтэргэ сүҥкэн оруоллаахтарын, бу күн Оконешниковтар аймах улуу миссияны толорбуттарын бэлиэтээтэ.
Нэһилиэк баһылыга Николай Федоров Нөөрүктээйи нэһилиэгиттэн 235 буойун сэриигэ барбытыттан 129-ра сэрии толоонугар охтубутун, үстүү-түөртүү үлэни кыайар хоодуот уолаттарын сэриигэ атаарбыт дьиэ кэргэттэр үгүстэрин ахтан ааста.
Миитин түмүгэр Ис дьыала үлэһиттэрэ буойун чиэһигэр үстэ салют ыттылар.
Комментарии
Авторизация на сайте через социальные сети