Киһи аҥаардас килиэбинэн эрэ олорбот, сүрэҕи өрүкүтэр, санааны кынаттыыр, дууһаны үөрдэр духуобунай кинигэлэргэ эмиэ наадыйар. Уопсайынан даҕаны, 5 Франция батар тымныы тыйыс айылҕалаах Сахабыт сиригэр хайа баҕарар табаары улуустарынан тарҕатар кэккэ күчүмэҕэйдэрдээх, туһунан ыарахаттардаах.
-- Арай, кинигэ атыылааччылары коммерческай тэрилтэ курдук буолбакка, сокуон быһыытынан, культурнай-сырдатар тэрилтэ ахсааныгар киллэрдэххэ, маҕаһыын куортама биллэрдик чэпчээн, кинигэ тарҕатыытын сыралаах үлэтигэр төһүү күүс буолуо этэ диэн тыл көтөхпүтэ РФ культураҕа министирэ Владимир Мединскэй. Кини көдьүүстээх этиитин өйөөн, олоххо киллэрэр буоллар, норуокка төрөөбүт тыл сүөгэйин-сүмэтин, литературнай айымньыларын тиэрдэргэ күүс-көмө буолара саарбахтаммат, -- диэн эттэ кыһа дириэктэрэ Август Егоров.
Кинигэни тарҕатар сулууспа салайааччыта Луиза Бястинова:
-- Кинигэ таһааран, нэһилиэнньэҕэ тарҕатарга биһиги дьон интэриэһин, тугу ааҕыан, билиэн-көрүөн баҕарарын учуоттуубут. Үлэбит саамай уустуга диэн уһук хоту улуустарга кинигэ тиэрдии. Холобур, 1 кг. таһаҕаһы ыытарга 200 солк. төлүүбүт, онон, кинигэ сыаната биллэрдик ыараан тиийэр. Аны хоту үксүн саамай сыаналаах көлө -- сөмөлүөт эрэ көтөр. Билиҥҥи туругунан, улууска 6 маҕаһыын үлэлиир, ол куортамын, нолуогун, айанын ороскуотун барытын бэйэбит уйунабыт. Кэлиҥҥи кэмҥэ кэтээн көрдөххө, дьон уус-уран айымньыны атыылаһарын сэргэ, үгүстэр практическай суолталаах, иистэнэргэ туһанар уонна оҕо кинигэлэрин ордук хамаҕатык ылаллар, -- диэн үлэ хаамыытын сырдатта.
Национальнай библиотека тэрийэн ыыппыт ыйытыгынан саамай ааҕар 45 – 54 диэри саастаах дьон эбит. Кинилэр Куорсуннаах, Егор Неймохов, Сэмэн Тумат, Семен Маисов, Галина Нельбисова о.д.а. айымньыларын сэргииллэрин эттилэр. Кыһа биир саамай бииргэ үлэлэһэр партнера «Книжнай маркет» дьон ордук «Эдьиий Дора» уонна оҕо кинигэлэрин хамаҕатык атыылаһалларын билиһиннэрдэ.
Итинник санаа үллэстиитин кэнниттэн, кинигэни тыа сиригэр тарҕатарга Орто Халыма, Уус Маайа, Абый, Уус Алдан, Амма улуустарын хаһыаттарын кытта сөбүлэһиигэ илии баттааһына буолла. Бу үтүө дьыалаҕа сотору кэминэн Кэбээйи улууһа кыттыһыахтаах. Салгыы төгүрүк остуол түмүгүнэн Сахабыт сирин олохтоохторугар, тустаан тыа сиригэр, ыраах улуустарга кинигэни тиэрдэр үлэни тупсарарга СӨ Бэчээккэ уонна көрдөрөр-иһитиннэрэр тиһиликкэ Департаменыгар этиилэр киириэхтэрэ.
Комментарии
Авторизация на сайте через социальные сети