Элбэх кэпсэтии, туруорсуу кэнниттэн «Интелстройпроект» ХЭТ бырайыагынан турба акылааттаах, сэндвич-панель эркиннээх спорт саала тутуутун А.П. Колосов дириэктэрдээх «Илин Аартык» ХЭТ 2014 с. тутан саҕалаабыта. СР Үөрэҕин министерствота бигэргэппитинэн 8,5 миэтэрэ үрдүктээх, 809,99 кв.м. иэннээх толору хааччыллыылаах, волейбол, баскетбол, мини-футбол оонньуурга, национальнай ыстаныыга дьарыктанарга, теннистииргэ уонна тустууга анаан туспа саалалардаах спорт саала ааспыт сыл бүтүүтэ үөрүүлээх быһыыга-майгыга аһыллынна. Онон 2016 сылга НПК устудьуоннара, үлэһиттэрэ саҥа спорт саалаҕа астына-дуоһуйа үөрэнэн, дьарыктанан саҕалаатылар.
Үөрүүлээх тэрээһиҥҥэ колледж устудьуоннарын, үлэһиттэрин үөрүүлэрин үллэстэ СР үөрэҕин министрэ Феодосия Габышева, С.Ф. Гоголев аатынан Дьокуускайдааҕы педколледж дириэктэрэ Ирина Любимова, Дьокуускайдааҕы үрдүкү спортивнай чыпчаал оскуолатын дириэктэрэ Александр Игнатьев, СР Баайга-дуолга уонна сиргэ сыһыаҥҥа министрин солбуйааччы Михаил Никифоров, «Нам улууһа» МТ баһылыгын бастакы солбуйааччы Инна Сивцева, «Ленскэй нэһилиэк» МТ баһылыгын солбуйааччы Андрей Бочкарев, республикатааҕы оҕо спортивнай оскуолатын дириэктэрэ Семен Ядрихинскай, «Илин Аартык» ХЭТ тутааччылара, улууспут биллэр спортсменнара уо.д.а. кэлбиттэр.
Үгэс быһыытынан саҥа дьиэҕэ киириигэ аал уоту оттон колледж ытык киһитэ Николай Гурьев арыалдьыттардаах киирэн алгыс сиэрин-туомун толорбутун кэннэ, «Айылҕан» үҥкүү ансаамбыла бырааһынньыгы сахалыы үҥкүүнэн аста. Феодосия Габышева студеннары, колледж үлэһиттэрин эҕэрдэлээн туран НПК дириэктэрин хаһаайыстыбаннай үлэҕэ солбуйааччытыгар А.А. Васильевка, «Илин Аартык» ХЭТ дириэктэригэр А.П. Колосовка уонна үлэһит И.В. Максимовка Бочуотунай грамоталары туттарда. Маны таһынан министр спорт саалаҕа анаан спортивнай инвентарь бэлэхтээтэ.
Маннык кэрэ-бэлиэ түгэҥҥэ «Илин Аартык» ХЭТ дириэктэрэ Анатолий Колосов НПК дириэктэригэр Екатерина Ядрееваҕа дьиэ символическай күлүүһүн дохсун ытыс тыаһыгар доҕуһуоллатан туттарда. Ону тэҥэ, Екатерина Владимировна колледжка спорт сайдыытыгар кылааттарын киллэрсибит спортсменнарга, выпускниктарга Анатолий Гладковка, Алексей Кутуковка, Юрий Эверстовка саха таҥаһын тиктэрэргэ сертификат, спорт саала тутуутугар күүс-көмө буолбут дьоҥҥо, тутааччыларга Махтал сурук туттартаата.
Саҥа спорт саала тутуллан колледжка спорт сайдыыта өссө күүһүрэригэр, устудьуоннар, үлэһиттэр эт-хаан өттүнэн чэгиэн буолалларыгар улахан төһүү күүс буолара саарбаҕа суох.
Комментарии
Авторизация на сайте через социальные сети