- «Сахабэчээт» үлэһиттэрэ бастаан Абаҕаҕа сылдьан баһылык Михаил Ефимовы кытта көрүстүлэр. Кини ыалдьыттарга нэһилиэк олоҕун-дьаһаҕын кылгастык билиһиннэрдэ.
- Сарсыныгар Амма улууһун дьаһалтатын дьиэтигэр улуус баһылыгын бастакы солбуйааччы Петр Лебедев уонна «Сахабэчээт» автоновнай тэрилтэ сүрүн дириэктэрэ Филипп Пестряков үөрүүлээх быһыыга-майгыга бииргэ үлэлиир туһунан дуогабар түһэристилэр. Нэһилиэк баһылыктарын ааттарыттан Василий Слепцов сурутууга көхтөөхтүк кыттарга ыҥырда. Салгыы Алтан нэһилиэгэр тиийэн библиотека дьиэтигэр ааҕааччылары, норуот маастардарын кытта көрсөн кэпсэттилэр.
- Россия Суруйааччыларын сойууһун чилиэннэрэ Уйбаан Ойуур уонна Зинаида Архипова Абаҕа, Амма уонна Алтан библиотекаларыгар сылдьан олохтоох айар түмсүү чилиэннэрин кытта көрсөн ирэ-хоро сэһэргэстилэр, ыйытыыларыгар эппиэттээтилэр. Саха сирин дуобакка сүрүн тренерэ, Россия гроссмейстера Александр Азаров Амма дуобаты таптааччыларыгар маастар кылаас ыытта уонна сеанс биэрдэ.
- Киэһэ кулуупка «Сахабэчээт» тэрилтэ сурутуу акциятын ыытта. Олохтоохтор саха эстрадатын ырыаһыта Анатолий Бурнашов алыптаах куолаһын, биир дойдулаахтара, ХИФУ устудьуоҥката Туйаара Софронеева бэйэтэ айбыт ырыаларын дуоһуйа иһиттилэр. «Сахабэчээт» тэрилтэ үлэһиттэрэ кэнсиэргэ эмиэ көхтөөхтүк кытыннылар. Ол курдук, «Забота-Арчы» хаһыат отделын редактора Александр Лукин лотерея ыытта, ырыа ыллаата, менеджер Ньургуйаана Скрябина конферансьелаата, «Далбар Хотун» сурунаал сүрүн редактора Зинаида Архипова хоһооннорун аахта, «Чолбон» сурунаал отделын редактора Иван Осипов хомуска оонньоото.
- - «Сахабэчээт» акцията табылынна. Дьон санаата кэлэн биһиги бородууксуйабытын атыыласта, оттон икки хаһыаттан, үс сурунаалтан турар комплекпытыгар 311 киһи суруттарда. Ким улуустары кэрийэр, ааҕааччыларын кытта атах тэпсэн олорон сэһэргэһэр, ол ситиһиилэнэр кэмэ кэлэн турар, -- диэн түмүк оҥордо Филипп Пестряков.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети