- Бэс ыйын 12 күнүгэр Дьэр нэһилиэгэр СР уонна РСФСР үтүөлээх механизатора В.Н.Исаков сырдык аатыгар кыра тыраахтардарынан күрэстэһии ыытылынна. Күрэс бастакы түһүмэҕэр көлүөһэ устуута, онтон салгыы көлүөһэлээх 30 м сүүрүү, төттөрү кэтэрдии, кумаҕынан барыы, эстекада үрдүгэр тахсыы, прицеп холбонуу, гарааска төттөрү кэннинэн астаран киллэрии, бэрэбинэни состоруу, көлөһөлөр быыстарынан эрийэ-буруйа сүүрдүү киирдилэр. Иккис түһүмэххэ, киэҥ сиринэн сүүрдүү, сыал ытыыта, бадарааннаах сири ааһыы бааллар. Оттон тыраахтары (тырахтарыыс уруулугар олорор) бириэмэҕэ ыраахха соһууга ким баҕалаах кытынна.
- Бу сонун күрэһи нэһилиэк аҕаларын сүбэлэрин бэрэссэдээтэлэ Петр Трофимов Дьэр түс-бас дьонун, аҕалары түмэн быйыл бэһис төгүлүн тэрийдэ.
- - Сахабыт сирин олохтоохторугар, тыа сирин үлэһит дьонугар норуот тыраахтарынан бу «Синтай» буолар. Биэс сыл анараа өттүгэр сыаната удамыр этэ. Дьон-сэргэ оччолорго ким кредит ылан, ким сүөһүтүн туттан бу тыраахтары булунан, оттоон-мастаан туһаныы бөҕөтүн туһаналлар. Туох санааттан маннык күрэһи ыытаҕыт диир буоллахха, эдэр дьон техникаҕа сыстан, сатабыллаах дьон буолалларыгар, Кытай омуга ситэ оҥорботоҕун оҥороллоругар, бары өттүнэн сайдан иһэллэригэр анаан тэрийбиппит,- диир Петр Николаевич.
- Аҕа сүбэтигэр кини эрэллээх көмөлөһөөччүлэринэн В. Соломоновы, А. Белолюбскайы, Э. Иннокентьевы, А. Шепелевы, П. Кондакову, А. Алексеевы киэн тутта ааттаата, бу дьон күрэһи тэрийсэн ыытыстылар.
- Быйылгы күрэс туһунан нэһилиэк баһылыга Николай Герасимов санаатын үллэһиннэ:
- - Ыһыахпыт тэрээһинэ бу бэһиc төгүлүн ыытыллар кыра тыраахтардар күрэстэринэн түмүктэнэр. Сылын аайы бу тэрээһиммитигэр спонсордар көмөлөрө-өйөбүллэрэ олус улахан.
- Бэрт хатыһыылаах, күүрээннээх күрэхтэһии түмүгүнэн Александр Заморщиков бастаата уонна биир киһи олорор эрэһиинэ тыытынан бириэмийэлэннэ (спонсор Слепцов Е.В., «Рысь» булт маҕаһыына). Иккис буолбут Николай Иннокентьев электрогенераторынан (В.Н.Исаков оҕолоро туруорбут бириистэрэ) биһирэннэ. Үһүс бочуоттаах миэстэҕэ тахсыбыт Прокопий Кондаков нэһилиэк бастакы тырахтарыыһа Капитонов И.И. кэргэнэ уонна оҕолоро туруорбут бириистэрин (шуруповерт) ылла.
- Тэрээһин тыраахтары соһуунан түмүктэннэ. Манна уонча киһи кыттыбытыттан Эдуард Иннокентьев бастыҥ көрдөрүүлэнэн быйылгы күрэс кыайыылааҕынан буолла.
- Дьэ ити курдук, Дьэр нэһилиэгин көхтөөх дьоно-сэргэтэ туһугар үбүлүөйдээх кыра тыраахтардар күрэстэрин тэрийэн ыытта. Сотору кэминэн от үлэтигэр күргүөмүнэн турунуохтара.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети