Икки күн устата Ил Түмэн депутаттара улуус олохтоохторун, депутаттарын кытта көрсөн дьыала төрдүн-төбөтүн быһаарыстылар. Сэрэйиллибитин курдук, мунньах олус тыҥааһыннаахтык барда. Этэргэ дылы, ыҥырыа уйатын тоҕо тарпыт курдук, мунньах саҕаланыаҕыттан бүтүөр диэри саала иһэ өрө сүгүллэ олордо.
Бүлүү улууһун депутаттара 2013 с. күһүн балаҕан ыйыгар быыбардаммыттара. Улуус устаабын быһыытынан, 25 киһи биир мандаатынан, 25 киһи партияттан талыллыбыттара. Манна даҕатан эттэххэ, өрөспүүбүлүкэ үрдүнэн 50 депутаттаах улуус сэбиэтэ соҕотох Бүлүүгэ эрэ баар. Онон, биир өттүнэн, Бүлүү улууһун депутаттара атыттарга холобурга сылдьаллар.
Нэһилиэнньэни, депутаттары кытта көрсүһүүттэн иһиттэххэ, тыл-тылга киирсибэт буолуу, айдаарсыы бастакы сессияттан тахсыбыт. Кэлин тиһэҕэр, эмиэ Өктөмҥө буолбут быһыы-майгы курдук, бэйэ икки ардыгар өстөһүү, сууттаһыы саҕаламмыт. Мунньах түмүгүнэн уопсай ылан көрдөххө, үгүс киһи сэбиэт ыһыллыбакка салгыы үлэлиирин туруорсар, оттон сорохтор ыһыллан саҥа састаап талыллара наадатын этэллэр. Бу туһунан сиһилии “Саха сирэ” хаһыат аныгыскы нүөмэрдэригэр суруйуоҕум.
Олохтоох салайыныы сис кэмитиэтин бэрэссэдээтэлэ Василий Местников бэлиэтииринэн, билигин Бүлүү улууһун депутаттара өссө биирдэ толкуйданан, бары өттүттэн ыйааһыннаан көрөн биир быһаарыныыны ылыныахтарын наада. “Биһиги нэһилиэнньэни кытта кэпсэппэккэ эрэ барытын үрдүттэн быһааран кэбиһиэхпитин сөп этэ. Ол эрээри хайа да түгэҥҥэ, ханнык да балаһыанньаҕа норуот санаатын истибэккэ, кинилэр тугунан тыыналларын аахсыбакка быһаарыныы ылар тутах. Билигин эһиги, депутаттар, туох дииргитин, туох санааны ылынаргытын дьоҥҥут-сэргэҕит кэтэһэн олорор. Ол онно бэйэҕит тус санааҕытын, бэйэ-бэйэҕитигэр кыыһырсыыгытын туора ууран, быыбардааччыларгыт иннигэр эппиэтинэс сүгэн, кинилэр тустарын санаан, уопсай үлэ, сайдыы туһугар санааҕытын ууран сөптөөх быһаарыныыны ылынаргыт буоллар”, - диэн этэр кини.
Билигин федеральнай сокуонунан, өскөтүн улуус депутаттара үс ый устата биир да мунньаҕы ыыппатах буоллахтарына, ол суутунан бигэргэннэҕинэ, регион салайааччыта бу сэбиэт ыһыллыахтааҕын туһунан сокуон барылын сокуону бигэргэтэр былаас уорганыгар киллэриэхтээх. Билигин ити сокуонунан Бүлүү улууһун депутаттарын сэбиэтэ ыһылларын туһунан сокуон барыла Ил Түмэн кэмитиэтигэр киирэн сытар.
Манна эбэн эттэххэ, билигин депутаттар баҕа өттүнэн ыһыллан хааллахтарына, аныгыскы быыбарга кыттар бырааптаналлар. Оттон сокуонунан ыһылыннахтарына, суукка “мин буруйум суох” диэн дакаастаан быыбарга кытталлар.
Ил Түмэн иһинэн тэриллибит бөлөх дьону-сэргэни кытта көрсөн санааларын истэн барда. Аны бу боппуруос сэтинньи 26-27 күннэригэр буолуохтаах Ил Түмэн аныгыскы мунньаҕар көрүллүөҕэ.
Комментарии
Авторизация на сайте через социальные сети