ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
10 июля 2015, 14:16

Бүлүү Лөкөчөөнүгэр рикотта, качотта сырдары оҥорон эрэллэр


Качотта уонна рикотта сырдары оҥорор Лөкөчөөн эдэр предпринимателэ Максим Харлампьев качотто сырын амсайбыт дьон, кырдьык, үчүгэй эбит диэн хайҕыыллар. Кэлии «Гауда» уонна «Эдам» сырдартан өссө ордук курдук. Олохтоох уонна экология өттүнэн ыраас буоллаҕа.

"Сыаната да удамыр соҕус – киилэтэ 340 солк. Биэс литрэ үүттэн биир киилэ сыр тахсар. Качотта уонна рикотта сырдары оҥоруу технологията уустук соҕус, ыллыҥ да сатаммат. Риккотто уонна каччотто иэдьэгэй уутугар  үүт эбэҕин уонна сөптөөх усулуобуйа баар буолуохтаах. Сотору кэминэн моцарелла уонна кытаанах монтазио сырдары оҥорон холонуом. Ити сырдары оҥорорго эбии оборудование ылыахтаахпын. Итальянецтар сыр амтана арыый атын да буолуон сөп диэбиттэрэ, ол сүөһү сиир отуттан, боруодатыттан тутулуктаах", - диэн кэпсээтэ сыр оҥорор Максим Харлампьев.

photoByWidth&id=39481&width=1000

Максим былырыын «ИП Харлампьев» диэн предприниматель буолан нолуок уорганнарыгар учуокка турбута. Тыа хаһаайыстыбатынан дьарыктанар предприниматель Илбэҥэ уонна Лөкөчөөн нэһилиэктэрин тыа хаһаайыстыбатын табаары оҥорооччуларын үүттэрин соҕотуопкалыыр. Максим кэпсииринэн, билигин үүт туттарааччылар 150 т үүтү туттарбыттар, сыллааҕы былааннара - 580 т үүт. «От уонна атырдьах ыйдарыгар сүрүннээн элбэх үүт туттарыллар», - диэн былаан туоларыгар саарбахтаабат.

photoByWidth&id=39482&width=1000

Максим аҕата Афанасий Кузьмич Харлампьев улууска биллэр биир бөдөҥ бааһынай хаһаайыстыбалаах фермер. Атын кэтэх хаһаайыстыбалары эмиэ түмэр «Тускул» бааһынай хаһаайыстыба сүөһүтүн ахсаана 300-тэн таҕыста, онтон 132 ыанар ынах. Бааһынай хаһаайыстыба сыл аайы  500 т оттуур.

«Тускул» иллэрээ сыл Бүлүү улууһугар кураан сатыылаан от аанньа үүммэтэҕэр, Бүлүү улууһуттан аан бастаан улуус таһыгар тахсан Дьокуускай Хатаһын арыыларыгар 400 т кэриҥэ оту бэлэмнээн, 400 км ыраах сытар дойдутугар тиэйэн, сүөһүлэрин сүтүгэ суох этэҥҥэ дьыл таһаарбыта.

Бу хаһаайыстыба улууска саха боруода ынаҕын иитэр соҕотох хаһаайыстыбанан буолар. Сыл аайы эбиллэн, төбөтүн ахсаана уонтан таҕыста.

Олоҕу кытта тэҥҥэ хардыылыыр, бүгүрү үлэһит дьон аны олох саҥа тэрээһини – сыр оҥоруутунан дьарыктанан эрэллэр. Sfoggia сыр оҥорор оборудованиетын атыыласпыттар, манна 120 л үүтүнэн сыр оҥорор тэрил, тоҥорор камера, сыр ванната киирэллэр. «Тоҥорор камерата сыаналаах, онтон атынын кэтэх хаһаайыстыбалаахтар да ылыахтарын, сыр оҥоруохтарын сөп эбит», - диир Максим.

Максим Москубаҕа тиийэн сыр араас суордун оҥорорго уһуйуллубут, технологиятын үөрэппит. Биллэн турар, сырдарын оҥорор закваскалара итальянскайдар. Бэс ыйыттан саҕалаан барыта 36 киилэ качотта уонна рикотта сырдары оҥорбут. Бүлүү Үрэх тунах ыһыаҕар сыра атыыга хамаҕатык барбыт.

Максим блигин бородууксуйатын атыыга таһаарарга «Туйгун ас» диэн торговай марка логотибын оҥотторо сылдьар.

Улууска тыа хаһаайыстыбатын сайдыытын сүрүннүүр улуус дьаһалтатын баһылыгын бастакы солбуйааччы, урут тыа хаһаайыстыбатын министерствотыгар департамент салайааччытынан уһуннук үлэлээбит  В.Т.Лукин эдэр предприниматель Максим Харлампьевы кытта көрсөн ирэ-хоро кэпсэттэ.

 " Билигин, мин билэрбинэн, Саха сиригэр сыр оҥоруутунан дьарыктанар өлүөхүмэлэр эрэ бааллар, бэйэлэрин технологияларынан оҥороллор, бородууксуйалара былдьаһык. Советскай былаас саҕана диэххэ дуу, Мэҥэ Хаҥалас үүтүн собуота оҥорор этэ. Сыр оҥоруутун курдук уустук дьыаланан дьарыктаммыкыт хайҕаллаах. Бүлүү сүнньүгэр билигин Харлампьевтартан ураты сыр оҥорор хаһаайыстыба суох. Лөкөчөөннөр технологиятын баһылаан эрэллэр, сотору кэминэн Харлампьевтар сырдара диэн эмиэ былдьаһык буолуоҕа", - диэн В.Т.Лукин сыр оҥорооччуларга эрэлин биллэрдэ.

Сыр дойдута - Италияҕа сыры биир дьиэ кэргэн көлүөнэттэн көлүөнэҕэ оҥороллоро, сыр оҥоруута уустуга, үлэлээҕэ, элбэх кистэлэІнээҕэ биллэр. Харлампьевтар саҥаны, саха дьарыктамматаҕын баһылыылларыттан чаҕыйбакка туруммуттара хайҕаллаах. Ханна да буоларын курдук дьыала сайдара барыта энтузиаст, бэриниилээх дьоннортон тутулуктаах. Харлампьевтар олор кэккэлэригэр киирэллэрэ саарбаҕа суох. 

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 760 Источник: ЯСИА Автор: Николай Куприянов Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ