- Сарсыарда улуус дьаһалтатын дьиэтигэр 1941-1945 сс. фроҥҥа ыҥырыллыбыт райсовет уонна райком үлэһиттэригэр аналлаах өйдөбүнньүгү - мемориальнай дуосканы арыйыы буолла.
- Саппаас подполковнига, сэрии кыттыылааҕа, өр сылларга бэтэрээннэр сэбиэттэрин эҥкилэ суох салайбыт А.И. Николаев уонна улуус дьаһалтатын эдэр үлэһитэ А.А. Унаров үөрүүлээх быһыыга-майгыга мемориальнай дуосканы арыйдылар.
- Улуус дьаһалтатын баһылыга С.Н. Винокуров тыл этиитигэр 70 сыл анараа өттүгэр, балаҕан ыйын 2 күнүгэр киһи-аймах историятыгар буолбатах ыар сэрии түмүктэммитин, аан дойду иккис сэриитигэр кыттыбыт, Кыайыы туһугар сырдык олохторун толук уурбут райсовет уонна компартия райкомун үлэһиттэригэр Улуу Кыайыы 70 сылыгар өйдөбүнньүк быһыытынан мемориальнай дуоска арылларын, сэрии бэтэрээнэ А.И.Николаев буойуттар кэриэстэригэр мемориальнай дуосканы арыйарга тыл көтөхпүтүн, көҕүлээбитин бэлиэтээтэ, бэтэрээҥҥэ дириҥ махталын биллэрдэ.
- Оройуон Сэбиэтин бэрэссэдээтэлэ Г.С. Корякин депутаттар ааттарыттан аан дойду иккис сэриитэ түмүктэммит күнүнэн бэтэрээннэри, мустубут дьону эҕэрдэлээтэ, Кыайыы 70 сылыгар аналлаах тэрээһиннэр үрдүк таһымнаахтык ыытыллыбыттарын бэлиэтээтэ.
- Саппаас подполковнига, сэрии кыттыылааҕа А.И.Николаев сэрии, тыыл бэтэрээннэрин ааттарыттан Советскай армия фашистскай Германияны, милитаристскай Японияны үлтүрүтэн Европа, Азия дойдуларын босхолообут Улуу Кыайыы 70 сылынан эҕэрдэлээтэ уонна партия, комсомол райкомнарын, райсовет үлэһиттэрин, сэбиэттэр, холкуостар бэрэссэдээтэллэрин ааттарын үйэтитэр өйдөбүнньүк дуоска ыйаммытын бэлиэтээтэ, фроҥҥа бастакынан ыҥырыллыбыт үлэһиттэр олохторун, бойобуой суолларын кэпсээтэ.
- Салгыы элбэх бойобуой уордьан, мэтээл кавалера, артиллерист, былырыын биһиги кэккэбититтэн туораабыт үтүө киһи Е.П.Бубякин төрөөбүт, олорбут Ст.Аржаков уулуссатын 18 дьиэтигэр мемориальнай дуоска арылынна.
- Улуус дьаһалтатын баһылыга С.Н.Винокуров, саппаас подполковнига, сэрии кыттыылааҕа А.И.Николаев, уола Г.Е.Бубякин, Саха Республикатын үтүөлээх учуутала А.И.Волгина, улуус, куорат бочуоттаах олохтооҕо Ф.Ф.Павлов уо.д.а. хорсун буойуну, патриоту үтүө тылынан аҕыннылар.
- «Оленскай» стадиоҥҥа «Өйдүүргүт тухары - мин тыыннаахпын» диэн Кыайыы 70 сылыгар анаммыт чэпчэки атлетикаҕа эстафета-акция ыытылынна. Эстафета дистанцията 1844 м – сэрии сылларын хонуктарыгар тэҥнэһэрин, эстафета И.И.Федоров дьиэ кэргэнин көҕүлээһининэн тэриллибитин, кыайыылаахтарга Федоровтар, Шипковтар дьиэ кэргэннэрэ бириистэри туруорбуттарын ахтыахха сөп.
- Эстафетаҕа Бүлүү куорат, Федоровтар, Үөһээ Бүлүү, Дьөккөн, БПК уонна инбэлииттэр обществоларын хамаандалара сүүрдүлэр. Бастакы миэстэҕэ педколледж, иккискэ – Бүлүү куорат, үһүскэ – Дьөккөн, төрдүскэ - Федоровтар хамаандалара таҕыстылар.
- Балаҕан ыйын 2 күнүн тэрээһиннэриттэн биир суолталааҕынан Олоҥхо дьиэтигэр элбэх киһи кыттыылаах сэрии бэтэрээнэ, саппаас подполковнига А.И.Николаев «Хорсуннар суоллара умнуллубат» диэн кинигэтин билиһиннэрии буолла.
- Улуус дьаһалтатын баһылыга С.Н.Винокуров, куорат дьаһалтатын социальнай боппуруостарга кылаабынай специалиһа М.А.Саввинова, милиция бэтэрээнэ, общественник Д.С.Седалишев, педколледж преподавателэ А.А.Новгородова, педколледж директора С.В.Иванов, балаҕаччылар аатарыттан И.А.Волков уо.д.а. кинигэни ырыттылар, ааптар туһунан үтүө тыллары эттилэр, бэтэрээн олоҕо дьоҥҥо холобур буоларын бэлиэтээтилэр, махталларын биллэрдилэр, Николаевтар дьиэ кэргэннэригэр кытаанах доруобуйаны, уһун үйэни баҕардылар.
- Күн иккис аҥарыгар Кыайыы болуоссатыгар үс Советскай Союз Геройун пааматынньыгар тэриллибит миитиҥҥэ улуус дьаһалтатын баһылыга С.Н.Винокуров, тыыл, үлэ бэтэрээнэ А.С.Волков, Дьөккөн нэһилиэгин дьаһалтатын баһылыгын солбуйааччы Н.Г.Степанов Бүлүү улууһа Геройдар дойдулара буоларын, Улуу Кыайыы суолтатын бэлиэтээтилэр, Советскай Союз Геройа Н.А.Кондаков туһунан истиҥник аҕыннылар, С.Н.Винокуров, Н.Г.Степанов, Н.Н.Харлампьев Геройдар пааматынньыктарыгар сүгүрүйэн харыйа гирляндатын уурдулар. Миитиҥҥэ мустубут дьон Социалистическай үлэ Геройдарын пааматынньыктарыгар сибэкки дьөрбөлөрүн уурдулар.
- Албан аат болуоссатыгар мустубут дьон сэрииттэн эргиллибэтэх биир дойдулаахтарын кэриэстээн Умуллубат уокка сибэкки дьөрбөлөрүн уурдулар, Т-55 тааҥка аттыгар тэриллибит миитиҥҥэ кытыннылар.
- Үөрүүлээх митиҥҥэ улуус дьаһалтатын баһылыга С.Н.Винокуров, тыыл бэтэрээнэ М.П.Веревкина, бэтэрээннэр сэбиэттэрин бэрэссэдээтэлэ Г.А.Солтуев уо.д.а. тыл эттилэр.
- Быйыл улууска биллэриллибит Сэрии кыттыылааҕын сылын түмүктүүр тэрээһининэн «Оленскай» стадиоҥҥа үлэ коллективтарын, муниципальнай тэриллиилэр, общественнай холбоһуктар парадтара буолла. Парадка улуус, куорат дьаһалталарын, үөрэх, социальнай, ветеринарнай управлениелар, Оҕо дьиэтин, оскуолалар, гимназия коллективтара, Өкүндү, Балаҕаччы, Чернышевскай, Халбаакы нэһилиэктэрэ уо.д.а. кытыннылар.
- Парады көрө, түмүк тэрээһиҥҥэ кытта сэрии бэтэрээннэрэ Афанасий Иннокентьевич Николаев, Николай Иванович Афанасьев, Прокопий Иванович Яковлев кэлбиттэрэ долгутуулаах буолла.
- Ити курдук, улууска Улуу Кыайыы 70 сылын бэлиэтиир элбэх сонун тэрээһиннэр үрдүк таһымнаахтык ыытылыннылар.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети