Туруоруу Тан Сянь-цзу классическай пьесатыгар олоҕурда. Кини дойдутугар драматургтар оскуолаларын төрүттээбитинэн биллэр, бу үөрэх кыһата кэлин линьчуаньскай диэн уларыйбыт. Кытай классическай пьесатын ис дьиҥэр таптал модун күүһэ ойууланар. "Пионовай беседка" аан тылыгар маннык суолталаах строкалар бааллар: "Ли-няны иэйии киһитэ диэн ааттыахха сөп. Иэйии хантан үөскүүрэ биллибэт, кэлээт, тута ханна эрэ дириҥник иҥмитэ эрэ баар буолар. Тыыннахтар өлүөхтэрин сөп, оттон өлбүттэр тиллиэхтэрин сөп... Өлөн баран хаттаан тиллэр кыаҕа суох буолуу – суох, бу иэйии үрдүкү көрдөрүүтэ буолбатах!" Тан Сянь-цзу XVI үйэҕэ олорбут интуитивист Ван Ян-мин (1472—1528) батыһааччыта буолан, бастакы миэстэҕэ айар үлэ көҕүлүүр күүһүн, иэйиитин таһаарар.
Азия төрүт театрдарын кытта драматическай айымньыларынан атастаһан, айар холбоһук түмүгэ – киэҥ хабааннаах бырайыак аан бастакытын историяҕа киирдэ. Ол курдук, Куньцюй национальнай театрын артыыстара саха олоҥхотугар олоҕурбут "Туйаарыма Куо" туруорууну көрдөрбүттэрэ.
Испэктээкил режиссера – Россия норуодунай артыыската Степанида Борисова. Сүрүн оруолларга театр эдэр кэскиллээх артыыстара Ирина Михайлова (Ду Линян)уонна Александр Дьячковскай-Саарын (Лю Менг Мей). Маны таһынан, туруорууга СӨ үтүөлээх артыыската Матрена Корнилова, Россия уонна СӨ үтүөлээх артыыһа Петр Баснаев, СӨ үтүөлээх артыыһа Иннокентий Дакаяров, эдэр артыыстар Гаврил Менкяров, Василий Борисов уонна да атыттар кыттыыны ыллылар.
Испэкэтээкил кэнниттэн Саха сирин делегациятын салайааччы, СӨ Ил Түмэнин бэрэссэдээтэлэ Александр Жирков, СӨ судаарыстыбаннай сүбэһитэ Андрей Борисов, култуура миниистирэ Василий Тихонов көрөөччүлэри истиҥник эҕэрдэлээтилэр.
Саха сирин парламенын спикерэ Александр Жирков эҕэрдэ тылыгар маннык диэн эттэ: "Дьон-сэргэ иэйии, сүрэх модун күүһүгэр итэҕэйиитэ сүүһүнэн, тыһыынчанан сыллары нөҥүөлээн аан дойду норуоттарын түмэр кыахтаах. Бүгүн биһиги Олоҥхобут театра кытай норуота өйүгэр-санаатыгар сүүһүнэн сыллар тухары илдьэ сылдьыбыт, көлүөнэттэн көлүөнэҕэ биэрбит уоллаах кыыс тапталларын туһунан номоҕу көрдөрдө. Өскөтүн биһиги артыыстарбыт хас эмэ үйэ анараа өттүгэр үөскээбит иэйиини эһиэхэ тиэрдибит буоллахтарына, сыалбытын-сорукпутун ситистибит", - диэтэ.
Андрей Борисов култуурунай бырайыак олоххо кииритигэр айымньылаахтык бииргэ үлэлэспиттэригэрКуньцюй театрын салайааччытыгар Янг Венг Ига махтанна.
Тыл үөрэхтээҕэ, тылбаасчыт тойон Сан испэктээкили көрөн баран санаатын үллэһиннэ: "Россияҕа маннык баай култууралаах, былыргы историялаах элбэх азиат олорорун билбэт этим. Бу испэктээкили көрөрбөр миэхэ олус интэриэһинэй этэ. Кытай уонна Саха сирин театрдарын икки ардыларыгар маннык атастаһыы барбыта култуура, театр өйдөбүлүн өссө дириҥэтэн, кэҥэтэн биэрэр".
Инньэ гынан, көрөөччүлэр икки култуура холбоһуутун илэ көрдүлэр. Маннык бырайыак икки театр сыһыана бөҕөргүүрүгэр эрэ буолбакка, Россия уонна Кытай бииргэ үлэлээһиилэрин чэрчитинэн Саха сирэ уонна Кытай икки ардыгар култуурунай ситим сайдарыгар төрүөт, төһүү күүс буолуоҕар саарбахтаммат. Дьоро киэһэ "Уруй-айхал!" өрөгөйүнэн түмүктэннэ.
Комментарии
Авторизация на сайте через социальные сети