Сунтаарга Күндэйэ үрэҕи туоруур муоста үөрүүлээх быһыыга-майгыга үлэҕэ киллэрилиннэ

Бэҕэһээ, атырдьах ыйын 24 күнүгэр, Сунтаар улууһугар РФ Федеральнай Мунньаҕын Федерация Сэбиэтин чилиэнэ А.К. Акимов, Саха Өрөспүүбүлүкэтин Государственнай Мунньаҕын (Ил Түмэн) депутаттара А.С. Уаров, С.М. Березин кэллилэр.


Кинилэр самолеттан түһээт, улуус баһылыга А.В. Григорьевы кытта сүбэ мунньах ыыттылар уонна күнүс 3 чаастан «Бүлүү» федеральнай суол 921 км баар Күндэйэ үрэҕи туоруур саҥа муоста үөрүүлээх аһыллыытын сиэригэр-туомугар кыттыыны ыллылар.



Бу улууспут историятын биир бэлиэ түгэнигэр «Бүлүү» федеральнай суол тутуутун управлениетын начальнига Н.И. Андреев, тутуу генеральнай бэдэрээтчигэ - «Спецмост» тэрилтэ (Хабаровскай) салайааччыта С.Е. Бегун, «Айан-суол» ХЭТ генеральнай директора В.В. Крыжановскай, «Сунтаравтодор» генеральнай директора Ф.Э. Павлов, тэрилтэ урукку директора, билигин Дьокуускайга үлэлиир Д.Д. Тен, чугастааҕы нэһилиэктэр бэрэстэбиитэллэрэ кыттыыны ыллылар.
Улуус баһылыга А.В. Григорьев бэйэтин этиитигэр муоста ханнык да федеральнай программаҕа киирбэккэ эрэ, капитальнай өрөмүөн суотугар тутуллубутугар сүрүн өҥөлөөх «Бүлүү» федеральнай суол тутуутун управлениетын начальнига Н.И. Андреевка улахан махталын тириэртэ. Сунтаар нэһилиэгин баһылыга Э.Е. ФилипповНиколай Ивановичка Сунтаар нэһилиэгин бочуоттаах гражданинын аатын иҥэрдэ.


Эҕэрдэ тылы А.К. Акимов, Н.И. Андреев, С.Е. Бегун, С.М. Березин, А.С. Уаров уо.д.а. эттилэр. Тутууга үлэлэбит бастыҥ үлэһиттэргэ улуус дьаһалтатын, федеральнай суол управлениетын наҕараадалара туттарылыннылар.
Муоста аһыллыытын сахалыы сиэрин-туомун норуот ырыаһыта И. Ф. Васильев толордо.
Ити курдук урукку өттүгэр айаҥҥа-сырыыга элбэх кыһалҕалары үөскэппит Күндэйэ үрэҕин туоруур муоста аныгы ирдэбилгэ эппиэттиирдии тутуллан үлэҕэ киирдэ. Биллэн турар, дьон-сэргэ улахан махталын Хабаровскайдааҕы муоста тутар биригээдэ уонна биһиги «Айан-суол» тэрилтэбит үлэһиттэрэ, механизатордара ылыахтара турдаҕа.

Улуус историятыгар киирэр биир бэлиэ тэрээһинин ыытыллыытыгар Элгээйи, Күндэйэ нэһилиэгин дьаһалталара улахан күүс-көмө буоллулар.
Ити курдук, киэҥ нэлэмэн Саха сиригэр биир саамай үчүгэй суоллааҕынан аатырар Сунтаар улууһугар биир саҥа муоста тутулунна.