«2015 сыл уон ыйын түмүгэ көрдөрөрүнэн арыгыны утары сокуону кэһии эбиллибит. Ол курдук, урукку өттүгэр администартивнай быраабы кэһии 7076 боротокуола оҥоһуллубут эбит буоллаҕына, ити көрдөрүү 8170 диэри эбилиннэ. Итирик туруктаах сылдьан буруйу оҥоруу 705-тэн 764-кэ диэри элбээбит», - диэн ис дьыала управлениетын иһитиннэриитигэр этиллэр.
Полиция полковнига Юрий Левинов итирбити аһарыы тэрилтэлэрэ наадаларын туһунан куорат Думатын депутаттарыгар куруук этэр.
«Медвытрезвитель тутаах суолталаах. Итирик киһи бэйэтигэр, тулалыыр дьоҥҥо улахан кутталы үөскэтэр. Онон, кинини тута дьонтон тэйитиэххэ, буруйу-сэмэни оҥорботун туһугар хонтуруоллуохха наада. Муҥур уһугар, итирик киһи тоҥон өлбөтүн туһугар маннык тэрилтэлэр наадалар. Урукку өттүгэр медвытрезвитель араас быһылааны эрдэттэн сэрэтэрэ. Оттон билигин итирик сылдьан буруйу оҥоруу көрдөрүүтэ элбии турар. Биһиги өрөспүүбүлүкэбитигэр арыгыны утары биир кэлимсэ үлэлиир буоллахпытына, аны 15-20 сылынан маннык тэрилтэлэртэн аккаастаныахпытын сөп», - диир эксперт, социологическай наука кандидата Юрий Жегусов.
«Саха сирин баһылыга Егор Борисов сорудаҕынан Алдаҥҥаа, Бүлүүгэ, Ленскэйгэ, Мииринэйгэ, Нерюнгрига, Ньурбаҕа, Өлүөхүмэҕэ итирик дьону быстах кэмҥэ тутар, кинилэргэ медицинскэй көмөнү оҥорор пууннары үлэлэтии туһунан муниципалитеттар, ИДьМ уонна доруобуйа харыстабылын министиэристибэтэ этиилэрин киллэриэхтэрэ», - диэн СИА-ҕа баһылык уонна бырабыыталыстыба дьаһалтатын уопсастыба сайдыытын департаменыттан эттилэр.
2015 сыл саҕаланыаҕыттан Дьокуускайга «Кэскил» ХЭТ государтсвеннай хантараак чэрчитинэн маннык пууну үлэлэтэр. Быраас, санитар, охранник үлэлииллэр, видеонаблюдение баар. Пуун үс балааталаах: 3 куойка – дьахталларга, 6 - эр дьоҥҥо, 5 куойкалаах изолятор баар. Тэрилтэни үлэлэтэргэ 4 мөл. солк. кээмэйдээх үбүлээһин көрүллүбүт.
«Вытрезвитель – социальнай суолталаах эбийиэк. Манна оҥоһуллар өҥө босхо буолуохтаах. Итирбити аһарар пууннарга кэлбит дьон анал медицинскэй көмөҕө наадыйбаттар. Пууннар итирбит киһи буруйу оҥорботун, доруобуйатыгар охсууну ылбатын туһугар кини быһыытын-майгытын хонтуруоллуохтаахтар», - дииллэр департамеҥҥа.
Комментарии
Авторизация на сайте через социальные сети