Оройуоҥҥа бастакынан Дьиикимдэ нэһилиэгэ аһыҥаны утары охсуһууга турунна. Манна Россельхозкиин Саха сиринээҕи филиалын анал исписэлииһэ кэлэн үлэлэһэ сылдьар. Ходуһаларга аһыҥа мэнээктээбитэ тута көстөр, исписэлиис анал куйуурунан аҕыйахта дайбаабытыгар сеткатын иһэ аһыҥанан туола түстэ. Ходуһаҕа ыстарарга анал «Аккорд» диэн дьаат туттуллар. Анал техниканан итиэннэ сүгүллэр опрыскивателинэн ыстараллар.
Биллэн турар, дьаат аата дьаат, куһаҕан дьайыылаах буолар, чуолаан сүөһүгэ сэрэхтээх. Дьааттаммыт сиргэ 20 күннээх харантыын биллэриллэр. Маныаха «Дьиикимдэ нэһилиэгэ» МТ дьаһалтата дьааттаммыт сиргэ сүөһү киирбэтин диэн ходуһалар күрүөлэрин саҥардыыга эрдэттэн үлэлэспит. Бу күннэргэ нэһилиэккэ аһыҥаны дьааттаан бүтүөхтэрэ. Ол кэннэ өссө хас да нэһилиэккэ маннык үлэ барыа, уопсайа оройуон үрдүнэн 5200 гектартан тахса иэннээх сиргэ аһыҥаны дьааттыахтара.
Комментарии
Авторизация на сайте через социальные сети