Биһиги бүгүн Хаҥалас улууһун ОДьКХ филиалын дириэктэрэ А.С.Захаровы кытта көрсөн үлэни-хамнаһы, кыстыкка киириини кэпсэттибит: - Улууспутугар 2015-2016 оттук сезонугар кыһыҥҥы кыстыгы үчүгэй бэлэмнээх көрүстүбүт. Ол курдук, хапытаалынай өрөмүөҥҥэ да буоллун, эбии дохуоппутунан хочуолунайдары кыстыкка бэлэмнээһин да буоллун. Россия үрдүнэн, төһө да кириисис сатыылаатар, этиэхпин баҕарабын, кэллэктииппитигэр бары үлэһиттэр тус үлэлэригэр эппиэтинэстээхтик сыһыаннаһаннар, туруоруллубут сыалы-соругу 100 % толордубут. Оттук туһунан этэр буоллахха, таас чохпутун, нефть аҕалыытын бүүс бүтүннүү аҕалан турабыт. Итини сэргэ, быйыл чааһынай биирдиилээн ыалларга итии ситимин холбооһун бырагыраамматынан үһүс сылбытын үлэлиибит. Итиннэ улуус уонна нэһилиэктэр олохтоох дьаһалталарын кытта бииргэ сомоҕолоһон үлэлээммит номнуо биэс нэһилиэккэ улахан үлэни толордубут. Чуолаан, И.В.Оболкина баһылыктаах, Кыһыл Үрүйэ олохтоохторугар барыларыгар, Хачыкаат нэһилиэгэр 20-тэн тахса ыалга сылаас ситимэ холбонно. Бу курдук, тэтимнээх үлэ соҕуруу нэһилиэктэргэ Үөдэйгэ, Сиинэҕэ ыытылыннылар. Быйыл от ыйыттан, сүрүн үлэһиттэргэ хамнас 23% үрдээтэ, онон үлэһиттэрбит кытаанах санаалаах быйылгы оттук сезонун тэрээһиннээхтик үчүгэйдик , туох да саахала суох этэҥҥэ туоруурга эрэллээхпит. Нэһилиэнньэҕэ да, тэрилтэлэргэ да хаачыстыбалаах өҥөнү оҥорорго дьулуһабыт,- диэтэ дириэктэр Андрей Степанович.
Салгыы, Сэбиэскэй былаас кэмнэригэр тутулубут, РММ улахан таас киэҥ-куоҥ ыраас хочуолунайыгар тиийэбит. Газооператордар, сантехниктар, слесардар үлэлиир-сынньанар хосторо бары өттүнэн табыгастаах эбит, дьиҥ үлэлиир киһиэхэ усулуобуйа барыта баар. Быйыл урукку сүүнэ улахан хочуолунайдар оннуларыгар, дьоҕус гынан баран сөбүгэр кыамталаах саҥа хочуоллары туруорбуттар, холбообуттар. Маны барытын, кылаабынай иженер эбээһинэһин толорооччу С.А.Пахомов батыһыннара сылдьан көрдөрдө, кэпсээтэ: - Урукку хочуоллар эргэрдилэр уонна оттукка гаас, уот өттүгэр ороскуоттара улахана бэрт. Бу быйыл ОДьКХ Хаҥаластааҕы филиала бэйэтин күүһүнэн саҥа хочуоллары туруордубут. Билигин саҥардыы үлэлээн эрэллэр, оттукка кэмчилээһин балайда тахсыа диэн сабаҕалыыбыт,- диир Семен Александрович. Салгыы «Катапиллер» гаас генераторын көрдүбүт. Энергетиктэртэн тутулуга суох буолар инниттэн, электэриичэскэй эниэргийэни миэстэтигэр ылар сыаллаах бу омук тэрилин туруорбуттар. Бу күн сменаҕа 14-с сылын үлэлиир О.С.Миронова көрүстэ, кини үлэтин-хамнаһын маннык билиһиннэрдэ: - Мин 2001 сыллаахтан үлэлиибин. Манна түөрт буолан сменанан солбуйсан сылдьабыт. Быйылгыттан саҥа хочуоллар үлэҕэ киирэннэр, үлэлииргэ олус үчүгэй буолла. Кэлэр сылларга төһө кэмчилээһин тахсыбыта көстүө. Үлэлииргэ усулуобуйа баар, салалтабыт туох баар наадабытын барытын булан биэрэр, үлэлии сатыыбыт,- диир үөрэ-көтө газооператор Оксана Семеновна. Дьон олорор дьиэлэригэр, тэрилтэлэргэ сылааһы тиэрдэр сүүнэ улахан хочуолунай саҥа хочуолларын турбатыттан торҕо буруо унаарар.
Ааптар хаартыскаҕа түһэриитэ.
Комментарии
Авторизация на сайте через социальные сети