“Fischer Sports GmbH” компанияны 1924 сыллаахха Йозеф Фишер диэн киһи Австрияҕа тэрийбит. Билиҥҥи кэмҥэ бу компания хайаттан түһүү, хайыһар тэриллэрин үрдүк хаачыстыбалаахтык оҥоруугааан дойдуга инники күөҥҥэ сылдьар. Оҥорон таһаарар спортка аналлаах тэриллэрэ үрдүк хаачыстыбалаахтарынан биллэр.
Компания специалистара Алдан трассатыгар хайыһар, биатлон тэриллэрин, маастары, парафиннары бэрэбиэркэлээтилэр.
Быйылгы дьылга Россия биир күүстээх биатлониһа Антон Шипулин контракт түһэрсэн “Fischer Sports” оҥорбут хайыһарынан уонна бачыыҥкатынан эрчиллэр уонна күрэхтэһэр. Дойду сүүмэрдэммит хамаандатыттан биатлонистар Евгений Устюгов, Иван Черезов, Алексей Волков, Максим Чудов, хайыһардьыттар Алексей Петухов, Максим Вылегжанин уо.д.а бу компанияны кытта контракт түһэрсэргэ быһаардылар.
2018 сыл олунньу 9-25 күннэригэр Соҕуруу Корея Пхенчхан куоратыгар кыһыҥҥы XXIIIОлимпийскай уонна XII паралимпийскай оонньуулар ыытыллыахтара. Маны сэргэ Пекин 2022 сылга кыһыҥҥы олимпиаданы уонна паралимпиаданы ыытарга быраабы ылла. Оттон олимпиадалар ыытыллар дойдулара климаттарын уонна бириэмэлэрин араастаһыыта Алдантан улахан уратыта суохтарынан, Россия уонна Европа дойдуларын сүүмэрдэммит хамаандалара манна кэлэн айылҕа бэйэтэ оҥорбут хаардаах трассатыгар эрчиллэр буолуохтара. Онон "Фишер" компания интириэһэ өссө улаатта.
"Фишер" компания аналитик-консультаннара сүрүн үлэлэрин таһынан Спорт кыһыҥҥы көрүҥнэринэн дьарыктыыр киин кылаабынай корпуһугар баар хайыһарга уонна биатлоҥҥа олимпиецтары бэлэмниир Оҕо спортивнай оскуолатын иитиллэччилэрин кытта көрсөн хайыһары көрүүнү-истиини, күрэхтэһиилэргэ бэлэмнэниини, эрчиллиини ыытарга сүбэлэри биэрдилэр.
- “Сүүстэ истибиттээҕэр биирдэ көрбүт ордук дииллэринии, ханна да суох ураты айылҕаҕытын кытта билсэн,чинчийии ыытаммыт, билигин Саха сирин климатыгар сөп түбэһэр хайыһары, кини тэриллэрин хайдах оҥорору биллибит. Саха сирин хайыһардьыттарын кытта контракт түһэрсэрбит буоллар, үөрүө этибит. Онуоха аан дойду таһымнаах үрдүк көрдөрүүлэри ситиһиэхтэрин наада, ол бары өттүнэн табыгастаах айылҕалаах дьоҥҥо эһиэхэ кыаллар суол,”- диэн эттэ суруналыыстарга хамаанда салайааччыта Майкл Гроссеггер.
Комментарии
Авторизация на сайте через социальные сети