Хайа да сэрии кыттыылааҕар, сэрии диэн ыарахан олох оскуолата буолар. Ол туһунан өйдөбүл өссө да сибиэһэй, саамай эдэр афганец билиҥҥи сааһа түөрт уона эрэ, оттон Кавказ сэриитин бэтэрээннэрэ, Осетия боевой хайысхаларын кыттыылаахтара – отуттаах-отут аҕыстаах уолаттар. Саллаат – мэлдьи саллаат: бара турар сэрии, туох иһин буоларыттан тутулуга суох, кини мэлдьи хамандыырын бирикээһин толорор. Бу туһунан ханна даҕаны суруллубат, ким даҕаны ахтыбат...
Ол оннук дьылҕаламмыт уолаттартан биирдэстэрэ, Ботуев Сергей Сергеевич, олоҕун очура быһа охсон, сэрии уотугар түбэһэр. Кини, 1977 сыллаахха, кулун тутар ыйга, Үөһээ Бүлүү улууһун Хомустаах нэһилиэгэр төрөөбүтэ. 11 кылааһы бүтэрэн баран, армияҕа ыҥырыллар, ити 1994 сыл от ыйын 3 күнүгэр. Маҥнай, Нижний Новгород №3671 байыаннай чааһыгар түөрт ый сулууспалаабытын кэннэ, тутатына Чечняҕа командировкаҕа ыыталлар. Аҕыйах бириэмэ буолан баран, Грознай куоракка тиийэр. Кинилэр лааҕырдара, генерал-полковник Романовы бааһырпыт сирдэригэр, муоста анныгар турара. Кинилэр ол онно алта ый турбуттара. Сергей, боевой массыына наводчик-операторынан сылдьыбыта. Үс чааһы быһа, тохтобула суох барбыт киирсии туһунан, кини, бэрт кэбэҕэстик ахтара. Түөрт саллаат контузияламмыт, биир уол атахха таптарбыт. Сергейга благодарность биллэрбиттэр, атын биэс уолу наҕараадалыырга бирикээс түһэрбиттэр. Элбэх боевой сорудахтарга сылдьыбыт, Саха уола... Ол сыллар, быһыылар - кини өйүгэр-санаатыгар мэлдьи бааллар, онно кини доҕотторун сүтэрбитэ. Оннук биир табаарыһынан, Алексей Кондратьевы ахтар, ол уолга өлбүтүн кэннэ, Россия үрдүкү наҕараадатын, Орден Мужества иҥэрбиттэрэ. 1996 сыл, балаҕан ыйын 28 күнүгэр армияттан дембэллэнэн, алтынньы 3 күнүгэр, төрөөбүт дойдутугар, дьонугар эргиллэн кэлэр. Сергей улаханнык тугу даҕаны, хаһан даҕаны кэпсээбэт.
Сыллар ааһаллар буолан баран, өй-санаа син биир барытын хатыы, харайа, кистии сылдьар аналлаах. Сылдьан эрэ, утуйа да сытан: граната, снаряд дэлби тэбэрин, боевиктары кытары ытыалаһыылары, аймахтарыҥ суруктарын, бэриниилээх саллааттыы доҕордоһуу диэн тугун, хайдах даҕаны умнубаккын.
Комментарии
Авторизация на сайте через социальные сети