Кэпсэтиигэ Анаабыр, Үөһээ Дьааҥы, Кэбээйи, Өлөөн, Орто Халыма, Абый, Ленскэй, Өлүөхүмэ улуустарын дьаһалталара кытыннылар. Хоту улуустарга атырдьах ыйын 25-28 күннэриттэн хочуолунайдар үлэлээн, социальнай тэрилтэлэргэ уонна дьиэлэргэ итиини биэрбиттэр. Онон хоту улуустарга оттук сезона саҕаламмыт диир толору кыахтаахпыт. Ол эрээри, үгүс улуус коммунальнай хаһаайыстыбата уонна дьаһалталара оттук сезонун саҕалыырга бэлэмнэин туоһулуур анал пааспары оҥорор иликтэрэ билиннэ. Бары үтүктүспүт курдук кэлэр нэдиэлэ бүтэһигин эргин бэлэм оҥоруохпут диэн эрэннэрдилэр.
Түгэнинэн туһанан, СӨ ОДьКХ уонна энергетикаҕа миниистирин 1-кы солбуйааччы Гаврил Левинныын кэпсэттим:
– Гаврил Прокопьевич, үгүс улуус оттук сезонугар бэлэмнэрин туоһулуур пааспары ылбакка сылдьаллар эбит. Бытаарыы тахсар буолбут.
– Былырыын баара-суоҕа биэс муниципальнай тэриллии оттук сезонугар бэлэмин туоһулуур анал пааспары ылбыта. Онон ити кыһалҕа өрүү баар. Ирдэбил быһыытынан, балаҕан ыйын 15 күнүгэр диэри бары улуустар пааспары хайаан да ылыахтаахтар. Оттук сезонугар бэлэмнэрин туһунан бары ирдэбилгэ сөп түбэһиннэрэн акт оҥорторон, Ростехнадзорга биэриэхтээхтэр. Ол акт толоруллуутунан көрөн, пааспары биэрэллэр. Пааспары ылбатахтар, син биир акт оҥороллор эрээри, оттук сезонун анал көҥүлэ суох саҕалыырга күһэллэллэр.
- Туохтан бытаарыы тахсарый?
– Дьиҥэр, оннук айылаах уустук буолбатах. Кэмигэр оҥорон испэттэр, ол иһин, хойутууллар. Ол гынан баран, хоту улуустарга исписэлиистэр тиийбэттэр. Ити докумуону үчүгэйдик толоруохха наада. Биһиги былырыын ити тиэмэҕэ семинар ыытан, докумуону сөпкө толорууга сүбэ-ама биэрбиппит. Ол семинарбыт көдьүүһэ, көдьүүһэ суоҕа быйыл биллиэҕэ. Анал пааспардаах улуустар ахсааннара элбиир ини диэн эрэнэбит.
Комментарии
Авторизация на сайте через социальные сети