Олоҥхо декадатын арыллыытыгар Дьааҥы улууһун култуураҕа уонна духуобунаска управлениетын салайааччытын Екатерина Ноговицынаны көрсөн кэпсэттибит:
- Биһиги Дьааҥы улууһугар олоҥхо эйгэтигэр үлэлээбиппит ыраатта. Сурукка бастакынан киирбит олоҥхолоох дьон буоларбытынан киэн туттабыт. Иван Александрович Худяков суруйууларыгар “Верхоянский округ”, “Краткое описание Верхоянского округа” диэн үлэлэргэ биһиги, дьааҥылар, хайдах олорбуппут, сиэрбит-туоммут, фольклорбут жанрдара барыта онно киирэ сылдьаллар. Ол кэнниттэн эмиэ үгүс чинчийиилэр ыытыллыбыттара. Ити курдук биир дойдулаахпыт Ия Ильинична Стручкова ол кэм саҕана Дьааҥы улууһугар 62 олоҥхоһут олорон, ыллаан-туойан ааспыт диэн бэйэтин үөрэҕин түмүктүүр үлэтин суруйан, чинчийэн турардаах.
Биһиги биир киэн туттар киһибитинэн ийэ олоҥхоһуппут Дарья Андреевна Томская буолар. Кини олоҥхобутун ЮНЕСКО билиниитигэр сүдү кылааттаах, Японияҕа тиийэ кини олоҥхолоро биллибиттэрэ, араас омук тылларыгар тылбаастанан кинигэ буолан тахсаары бэчээккэ бэлэмнэнэн тураллар. Маны таһынан Дьааҥыга Олонхо ассоциациятын филиала арыллыбыта, үлэ күүскэ барар. Эһиил 2016 сылга өрөспүүбүлүкэтээҕи Олоҥхо Ыһыаҕын ыытаарыбыт долгуйа бэлэмнэнэ сылдьабыт. Араас хабааннаах былааннаах үлэ ыытыллар. Былааҥҥа Олоҥхо уонна Арчы дьиэтин тутуута киирэн турар.
Бүгүн Олоҥхо күнүгэр Дьокуускай куоракка кэлэммит кыттыыны ыла сылдьабыт. Онон ахсынньы 1 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр “Дьааҥылыын Олоҥхо ыһыаҕын уруйдуох!” диэн дьоро киэһэбитигэр бука барыгытын ыҥырабыт! Ахсынньы 5-6 күннэригэр Дьааҥыбытыгар Олоҥхо фестивалын ыытыахтаахпыт. Хас биирдии оскуола “Олоҥхо тыыннаах утумнарыгар” диэн араас хайысхаларынан үгүстээх үлэни ыытар.
Өксөкүлээх Өлөксөй аатынан Норуоттар доҕордоһууларын дьиэтэ
Комментарии
Авторизация на сайте через социальные сети