«Бу судургута суох эйгэ үлэһиттэрин туһунан кинигэ суруйар туһунан бастакы санааны «Полярные авиалинии» авиакомпания бортпроводниктарын начальнига  Надежда Ковальчук эппитэ. Кинигэ бэчээттэнэн тахсарыгар анаммыт сыраны-сылбаны эрэйэр үлэ биэс сыл устата салҕанан барбыта. Бу мин онус кинигэм, кинигэлэрим барыта авиация араас сулууспаларыгар анаммыттара», - диэтэ авиа үлэһиттэр сэбиэттэрин бэрэссэдээтэлэ  Михаил Васильев.

Кинигэ хас да араарыылардаах. Итиннэ «Полярные авиалинии», «Якутия», «Мирнинское авиапредприятие» авиакомпанияларга араас сылларга үлэлээбит бортпроводниктар ахтыылара, история чахчылара, хаартыскалар киирдилэр.

«Полярные авиалинии» авиакомпания генеральнай дириэктэрэ Александр Тарасов, куорат Думатын депутата  Марина Силкина, авиация бэтэрээннэрэ, летчиктэр, бортпроводниктар, Гагариннааҕы уокурук бэрэстэбиитэллэрэ, культура деятеллэрэ, уо.д.а кинигэ күн сирин көрбүт үөрүүтүн үллэстэ кэллилэр.

Атыы-промышленнай палаататыттан тэрээһиҥэ кыттыбыт  Ирина Полятинская  Михаил Егоровичка «Үлэ бочуоттаах бэтэрээнэ» үрдүк бэлиэни туттарда. Саха сирин суруйааччыларын сойууһун бэрэссэдээтэлэ  Иван Мигалкин, суруналыыс  Иван Борисов, бортпроводниктар Ольга Березовская, Надежда Ковальчук, Елена Яковлева, Тамара Красноярова кинигэ ааптарыгар истиҥ тылы эттилэр.

Аатырбыт Ту-154 хамандыыра  Александр Габышев: «Бу «Королевы неба Якутии» кинигэ бортпроводниктарга анаммыт соҕотох таһаары буолар», - диэтэ.

Кинигэ сүрэхтэниитин кэнниттэн үөрүүлээх тэрээһин кыттыылаахтара албан ааттаах авиатор, Сэбиэскэй сойуус дьоруойа  Валерий Кузьмиҥҥа анаммыт өйдөбүнньүк мэҥэ тааска тыыннаах сибэкки дьөрбөтүн уурдулар.

Рестораннар официаннарыттан хомуллубут бастакы стюардар 1920-с сылларга баар буолбуттара. Пассажирдары көрүүнү-истиини оччолорго эр дьоҥҥо эрэ итэҕэйэллэрэ. Дьону самолет салонугар киллэрии уонна таһаарыы кинилэр эбээһинэстэригэр киирэрэ. 1930 сылтан ыла быһыы-майгы уларыйбыта. Самолетунан көтүү кэмигэр медицинскэй көмөнү оҥорор 8 медсестраны үлэҕэ ылбыттара.

Саҥа быраабыланан 25-тэн аҕа саастаах, 53 кг ыарахана суох ыйааһыннаах, 163 см уһуна суох уҥуохтаах, медицинскэй үөрэхтээх, үчүгэй сэбэрэлээх кэрэ аҥаардары стюардесса дуоһунаһыгар ылар буолбуттара. 1930 сыл ыам ыйын 15 күнүгэр самолет аан бастаан стюардессалаах көппүтэ. Пассажирдар бу саҥа саҕалааһыны олус сэҥээрбиттэрэ. Кыргыттары тута Sky Girls - "небесные девушки" диэн ааттаабыттара. Саха сиригэр бортпроводниктар сулууспалара 1958 сыллаахха тэриллибитэ. Бастакы бортпроводнигынан Нина Никитична Миненко буолбута. Ити 1944 сыллаахха этэ.