«Оскуолаҕа киириэн иннинээҕи саастарыттан саҕалаан оҕолорго быраабы үөрэтиэхтээхпит. Үөрэх процеһыгар ити ураты миэстэни ылыахтаах», - диэтэ Сардана Гурьева.

Сыыппара сытыы чахчылара көрдөрөллөрүнэн, буруйу оҥорор оҕолор ахсааннарын көрдөрүүтэ эбиллибэт уонна намтаабат. Чопчу уонна чуолкай механизмнар олоххо киирдэхтэринэн эрэ быһыы-майгы уларыйар кыахтаах. Ити туһунан юстиция госкэмитиэтин уонна үөрэх министиэристибэтин үлэһиттэрэ этэллэр. Оҕо быраап туһунан билиилээх-көрүлээх буоларыгар туһаайан чопчу үлэ былаана үөскэтиллиэҕэ. «Республикаҕа сылын аайы быраапка анаммыт кылаас чаастара, лекциялар тэриллэллэр», - диир үөрэх миниистирин солбуйааччы Эдуард Кондратьев.

«Быраап туһунан» акция маныаха тус кылаатын киллэрэр. «Быраабы билии күнэ быйыл республика 400 оскуолаларыгар ыытыллыбыта. Эһиил бу тэрээһиҥҥэ суут приставтара, судьуйалар, прокурордар кыттыһыахтара. Оҕо бэйэтин быраабын, ону тэҥэ эбээһинэһин дьэҥкэтик билиэхтээх», - диэтэ С.Гурьева.