Ааптардар бырайыактарыгар 400 мөл.солк. анаммыта. Оҕо киинэтигэр - 140 мөл.солк., сериалларга – 200 мөл.солк. тыырыллыбыт.

400 мөл.солк. ааптардар 12 бырайыактарыгар бэриллэр. РФ министиэристибэтэ бюджеттан үп-харчы биэрэр бырайыактарыгар ханныктар киирбиттэрин туһунан этэр оруннаах.  «Белые ночи» Татьяна Воронецкая, «Вика» («Вера Оболенская») Андрей Кончаловскай, «Врач» Юрий Куценко, «Петербург. Категория чувств» киинэ-новелла хомуурунньуга Федор Бондарчук, «Спитак»  Александр Котт, «Коридор бессмертия» Федор Попов, «Председатель» Алексей Мурадов, «Единичка» Кирилл Белевич, «Созвездие Марии» Андрей Борисов, «Синдром Петрушки» Елена Хазанова, «Мотылек» Константин Худяков, «Стерпится-слюбится» Александр Сухарев.

Владимир Федоров саха драматургиятын аныгы классиката «Созвездия Марии» пьесата XVIII үйэ саҥатыгар, Василий Прончищев салайааччылаах хотугу улуу экспедиция кэмигэр илдьэр. Хотугу муустаах акыйааны чинчийии — киинэ эргийэр киининэн буолар. 1735 сыллаахха бэс ыйын 30 күнүгэр Прончищев «Якутск» шлюпканан Дьокуускайтан Өлүөнэ өрүһү таҥанары устар. Шлюпкаҕа 40 киһи уонна лейтенант Прончищев кэргэнэ Татьяна бааллар. Экспедицияҕа кыттыбыттар кэргэнниилэри Өлөөн өрүс төрдүгэр көмөллөр. Икки үйэ ааспытын кэнниттэн картографтар Прончищева аатынан саҥа арыллыбыт тумулу ааттыыллар. Ол аат дьоҕус хомоҕо көһөр. «Мыс» диэни бэлиэтиир «М» буукубаны кэлин сыыһа «Мария» диэн ааттыыллар. Василий Прончищев кэргэнин дьиҥнээх аата 1983 сыллаахха эрэ биллибитэ.

«Созвездие Марии» айымньыга таптал, таҥнарыы, хорсун быһыы тыктарыллар. Путешественник Василий Прончищев туһунан 2012 сыл күһүнүгэр Москваҕа Саха сирин күннэригэр республика нуучча драматическай театра ити туһунан испитээкили аан бастаан көрдөрбүтэ. Айымньы сюжетын Москва кинематографистара олус сэҥээрбиттэрэ. Икки сыл ааспытын кэнниттэн киинэ сценарийын суруйбуттара, ол улахан ситиһиилэммитэ.